Mungesa e turistëve por edhe e aktiviteteve dhe eventeve të cilat kërkojnë pjesëmarrje masive dhe shërbime, ka bërë që shumë hotele në mbarë vendin të jenë në rrezik falimentimi.
Por të parat që e kanë ndjerë goditjen nga pandemia janë hoteletn e mëdha në kryeqytet, të cilët më tepër se sa me turistë dhe vizitorë, mbaheshin nga eventet e ndryshme si dasma, takime, festa, mbledhje, forume etj.
“Hotel Tirana International”, i njohur si 15-katëshi ishte “viktima” e radhës që mbylli së fundi përkohësisht dyert e aktivitetit pas 41 vitesh punë, për shkak të krizës që krijoi pandemia Covid -19.
Burimet nga stafi i menaxhimit të këtij hoteli bënë të ditur për “Monitor” se nga tërmeti i vitit të shkuar e deri më tani, hoteli u mbajt i hapur nën humbje të mëdha.
Kostot e larta fikse për pagesat e punonjësve dhe mirëmbajtjen e godinës e bënë të pamundur vijimësinë. Hoteli, i cili është në funksion që nga viti 1979, do të ndalë aktivitetin deri në përmirësimin e situatës pandemike, dukë lënë pas 100 persona të papunë.
Të njëjtat burime pohuan se stafi do të përfitojë asistencën sociale sipas ligjeve në fuqi, me shpresën e rikthimit në punë me përmirësimin e situatës.
“Hotel Tirana” është një nga më të mëdhenjtë në kryeqytet me standardin e katër yjeve, me 170 dhoma, si dhe një nga ofruesit më të mëdhenj të shërbimit të konferencave.
Ikona e hotelerisë së kryeqytetit
Godina e “Hotel Tiranës” është simbol i kryeqytetit. Ai u vu në funksion në kohën e diktaturës në vitin 1979, pas 10 vitesh punime, me një arkitekturë të stilit socialist (projekt kinez).
Kjo godinë, ishte ndërtesa më e lartë e vendit deri para 10 vitesh. Përdorej ekskluzivisht për delegacione dhe turistë të huaj, gjë që e ka bërë atë gjthmonë një vend “misterioz” dhe intrigues për shqiptarët.
Në vitet 2004, hoteli u shit nga qeveria kundrejt një grupi investitorësh vendas, kundrejt vlerës 5.1 milionë euro. Në vitin 2001 ai i’u nënshtrua një rikonstruksioni dhe rimodelimi të plotë, duke e kthyer në një hotel me standarde “4 yje”, por pa prekur hapësirat që e karakterizojnë.
Në vitin 2012, Ramë Geci, sipërmarrës në ndërtim, bëhet 100% pronar i “Hotel Tirana International”, teksa vlera e hotelit arriti 37.5 milionë euro.
“Hotel Tirana International” ka qenë prej vitesh në listën e monumenteve të kulturës deri në vitin 2015, ku me vendim të Ministrisë së Kulturës, nuk e gëzon më këtë status.
Kompania “Geci” aktualisht është në kulmin e një investimi të ri që synon zgjerimin e “Hotel Tiranës” me një hotel të ri rreth 30 kate me pesë yje ngjitur me godinën aktuale të “Tirana International” ose pas tij.
Mbyllja e hoteleve në Tiranë nga pandemia
“Hotel Tirana” nuk është i pari i llojit të tij që mbyllet prej pandemisë së koronavirusit, e cila e ka dëmtuar rëndë sektorin e akomodimit në të gjithë botën.
Për shkak të kësaj krize këtë vit, në fillim, mbylli aktivitetin edhe hotel “Hilton” në Tiranë, i cili kishte pak më shumë se një vit aktivitet.
Burime pranë hotelit konfirmuan se pavarësisht situatës së vështirë, u mbajt në punë, për muaj të tërë, pjesa më e madhe e stafit, me shpresën se puna do të niste në shtator.
Situata nuk u përmirësua apo ndryshoi, ndaj përballë presionit për të paguar kredinë e investimit dhe pagat që zinin një fond jo të vogël, kompania u detyrua të bëjë zgjedhjen e mbijetesës në këtë moment të vështirë për të gjithë.
Hoteli do të qëndrojë i mbyllur të paktën deri në fund të marsit 2021.
Të njëjtat burime thanë se, stafi menaxhues i hotelit ka lëvizur dhe bashkë me të edhe menaxheri kryesor, i cili drejtonte “Hilton Garden Inn” në Tiranë, tashmë është dërguar për të menaxhuar një nga strukturat hoteliere të grupit në Turqi.
Largimi i stafit nuk ka qenë i lehtë në kushtet kur shumë prej tyre ishin trajnuar për një kohë të gjatë për të ofruar shërbimin sipas standardit që kërkon marka.
“Hilton Garden Inn” ishte marka e parë ndërkombëtare që hyri në tregun shqiptar pas largimit të “Sheraton” në fund të vitit 2017, i cili la pas një shije të hidhur.
Sektori i hotelerisë në vendin tonë është në kulmin e zgjerimit, por kriza e pandemike pritet të vërë në vështirësi edhe më të madhe efektshmërinë e këtyre investimeve.
/Burimi: Monitor.al/Përshtati: GazetaReforma.com/
