Nuk ka më asnjë dyshim që pandemia e koronavirusit më shumë se çdo gjë tjetër “sëmuri” sektorin e turizmit në Shqipëri, por edhe në mbarë botën.
Shifrat që vijnë për këtë sektor, tregojnë se turizmi në mbarë botën përfshirë edhe Shqipërinë tashmë është në ”intubim”!
Gjiganti i statistikave europiane “Eurostat” ka publikuar këto ditë edhe shifrat e net-qëndrimeve sipas muajve për vitin 2020, ku ndër të tjera jepen të dhënat edhe për Shqipërinë, që i përkasin 6 mujorit të parë të vitit.
Sipas Eurostat, ndërsa janari nisi pozitiv me rritje të ndjeshme të net-qëndrimeve në Shqipëri për qëllime turistike, me 68% në krahasim me të njëjtin muaj të një viti më parë, situata degradoi më vonë.
Në shkurt, kur dhe filluan të qarkullonin lajmet për virusin, por ai ende nuk kishte mbërritur zyrtarisht në Europë, numri i net-qëndrimeve u rrit me 5%.
Kur nisi rënia
Me hyjren e vitit 2020, në janar asnjë shenjë nuk u ndje dhe as nuk u kuptua nga operatorët turistikë shqiptarë që po përgatiteshin për pranverën.
Por në mars filloi rënia e thellë, me 78% net-qëndrime më pak, referuar të dhënave të “Eurostat”. Në prill nuk kishte asnjë turist në vend, teksa gjithçka ishte në karantinë.
Në maj, numri i net-qëndrimeve ishte 75% më i ulët se maji i vitit 2019-s. Në qershor filloi rikuperimi, por sërish shifra ra me 70%, pasi në qershor kishte vetëm 104 mijë net-qëndrimi, nga 352 mijë të njëjtën periudhë të një viti më parë.
Në total, për 6-mujorin, net-qëndrimet për qëllime turistike në vend ishin 319 mijë nga 806 mijë të një viti më parë, me një tkurrje prej 60%.
Eurostat mat net-qëndrimet në hotele, njësi të tjera akomoduese afatshkurtra dhe për pushime, sheshe me kampingje dhe kampera.
Krahasimi me rajonin
Në Maqedoninë e Veriut, me popullsi më të ulët dhe që ka më pak atraksione turistike se Shqipëria, numri i net-qëndrimeve në vite normale është më i lartë se në Shqipëri.
Për 6-mujorin e parë 2019, Maqedonia regjistroi 917 mijë net-qëndrime, ose 13% më shumë se Shqipëria. Por kjo mund të lidhet edhe me informalitetin e lartë të strukturave akomoduese në Shqipëri, që nuk raportojnë të gjithë xhiron.
Por, ndryshe nga Shqipëria, Maqedonia nuk arriti që të rikuperojë në maj dhe qershor, me numrin e net-qëndrimeve që ra përkatësisht me 98 dhe 94.5%.
Sipas Eurostat, në vitin 2020, industria e turizmit ka vuajtur nga shpërthimi i COVID-19. Kjo është e dukshme kur krahason shifrat e akomodimit të turizmit në vitin 2020 me ato të vitit 2019.
Nga janari deri në gusht 2020, numri i netëve të kaluara në institucionet e akomodimit turistik në BE, të tilla si hotele, njësi akomoduese pushimesh të tjera me qëndrim të shkurtër dhe kampe, arriti në 1.1 miliardë, një rënie prej 50% krahasuar me janar-gushtin 2019.
Duke parë të dhënat në muaj, rëniet më të konsiderueshme në numrin e netëve të kaluara në institucionet e akomodimit turistik u regjistruan në muajit Prill (-95%) dhe maj (-89%) krahasuar me muajt e njëjtë të 2019-s.
Në periudhën e verës, pati vetëm një rimëkëmbje të pjesshme, me rënie prej 71% në qershor, 42% në korrik dhe 32% në gusht. Në periudhën korrik-gusht 2020, numri i netëve të kaluara në institucionet e akomodimit turistik u ul me 37% krahasuar me të njëjtën periudhë në 2019.
/Burimi: Eurostat/ Përshtati: GazetaReforma.com/
