Pamje shqetësuese/ Drejtori i Mjekësisë Ligjore reagon për fotot e viktimave në morg

Google+ Pinterest LinkedIn Tumblr +

Fotot e morgut janë të vërteta dhe në frigorifer nuk ka vende për shkak të numrit të lartë të vdekjeve. Konfirmimi ka ardhur nga  Drejtori i Institutit të Mjekësisë Ligjore Bledar Xhemali. Ai ka reaguar në lidhje me fotot e publikuara nga ambientet e institucionit që ai drejton, ku shiheshin viktimat e covid të shtrira në dysheme. Xhemali justifikohet se në pamundësi për t’i vendosur kufomat në ambiente frigoriferike për shkak të numrit të lartë të fataliteteve, ato vendosen mbi tavolina, por sipas tij mund të ndodhë që ato të lihen përkohësisht edhe përtokë.

Deklarata e plotë

Në emër të institucionit dhe të stafit tonë, shpreh indinjatën për inskenimin e bërë me fotografitë që janë nxjerrë në media nga mjediset e morgut! Periudha që po jetojmë në punën tonë, ashtu si për të gjitha institucionet e ngjashme në spitalet e mbarë botës ka qenë tejet e mbingarkuar. Padyshim që morgu nuk bën asnjë përjashtim në pamundësinë për t’i sistemuar denjësisht të gjitha kufomat në mjediset frigoriferike në dispozicion, kur ka më shumë fatalitete.

Kur jemi në pamundësi, ato sistemohen në tavolina, më pas në barela dhe kur ndodh që të jenë më shumë, vendosen me respektin më të madh në dysheme bashkë me sendet vetjake të paketuara, pasi kryhen proceset përkatëse në pritje që t’u dorëzohen familjarëve. Por kurrsesi nuk është rrëmuja e paraqitur në fotot keqdashëse të shpërndara në media. Sendet personale që shoqërojnë trupat, janë veshjet e të ndjerëve, të cilat përbëjnë kujtime të çmuara për familjarët.

Edhe logjika më elementare të thotë se ky është thjesht dhe vetëm një inskenim! Është e dhimbshme deri në neveri, që autori i fotove është kujdesur të kryejë një shërbim të porositur për të nxitur panik dhe nxirë bluzat e bardha të institucionit. Ne kemi njoftuar institucionet eprore për këtë operacion keqdashës dhe kriminal në raport me publikun dhe shpresojmë që fajtori të identifikohet e të vihet para drejtësisë.

/GazetaReforma.com/

Shpërndaje
Share.

Komento