Familja Bushi ka denoncuar administratorin e pallatit të tyre në emisionin investigativ “Stop”.
Sipas kësaj familjeje, ai ka filluar të bëjë riparimet e dëmeve pa u kryer akt-ekspertimi nga strukturat përkatëse.
Bëhet fjalë për një pallat 11-katësh në zonën e Plazhit në Durrës.
Kati i dytë dhe i tretë i njërës anë janë dëmtuar plotësisht.
Ekspertiza e parë e nxorri pallatin të pabanueshëm dhe i vendosi shirit për të mos lejuar futjen e banorëve në banesa.
Por, shiriti i është hequr dhe administrator ka nisur riparimet privatisht pa marrë leje.
Ai vendosi skela dhe nisi ndërtimin e mureve të rrëzuara, por vetë banorët nuk e lejuan.
“ Administratori i pallatit ka sjellë disa persona ku kanë vënë skelat për të rindërtuar, për të mbuluar, duke fshehur provat. A është e lejueshme të fillosh me mbulimin e provave, kur ne nuk kemi një akt që ky pallat është i banueshëm apo jo? Kanë ardhur vetëm një herë ekspertët, ku kanë vënë dhe shiritin dhe e cilësuan si të pabanueshëm.Pastaj shiriti u hoq edhe siç e shihni është bërë një mbulesë e vogël. U hoq shiriti, domethënë që kur hiqet shiriti pallati është i banueshëm. Nuk e di nëse aty mund të futet njeri të jetojë sepse është e pamundur”, është shprehur njëra prej banoreve të këtij pallati në Durrës.
Nuk dihet nëse ky pallat ka dëmtime në strukturë mbajtëse apo në mure ndarëse.
Ndërkohë ekspertët bëjnë thirrje që të mos bëhet asnjë ndërhyrje në banesat e dëmtuara pa u bërë më parë ekspertiza.
