Adriatik Lapaj është paraqitur sot në Gjykatën e Posaçme kundër Korrupsionit dhe Krimit të Organizuar, në kuadër të procesit gjyqësor ndaj deputetit Agron Shehaj, të cilin e ka paditur për shpifje.
Kreu i partisë “Shqipëria Bëhet” ka depozituar më herët kallëzim penal ndaj Shehajt, duke e akuzuar për deklarata të pavërteta që, sipas tij, kanë cenuar rëndë integritetin personal dhe profesional.
“Kam shmangur përplasjet, por kush i kërkon, do të më ketë përballë,” u shpreh Lapaj para mediave, duke shtuar se as ai dhe as familjarët e tij nuk posedojnë asnjë pasuri në Shqipëri.
Ai mohoi akuzat për përfaqësim të kompanive të lidhura me krimin dhe ftoi publikisht që të verifikohen të gjitha vendimet e dhëna nga vjehrri i tij si gjyqtar, për të provuar nëse ka pasur ndonjë përfitim apo ndikim nga ana e tij.
Lapaj i kërkoi Shehajt të paraqesë prova konkrete për deklaratat publike, duke i konsideruar pretendimet e tij të pavërteta dhe të dëmshme.
Nga ana tjetër, Shehaj e ka akuzuar Lapajn për përfitimin e 45 milionë lekëve nga kompania “Merkaj 3 shpk”, e sekuestruar nga SPAK për lidhje të dyshuara me grupin kriminal “Çopja”. Lapaj e mohoi kategorikisht këtë, duke sqaruar se bëhej fjalë për pagesa legale në kuadër të një shërbimi ligjor dhe jo për përfitime të paligjshme.
