Në dhjetor nisma “Thurje” depozitoi në SPAK një kallëzim me anë të së cilit kërkoi hetimin e disa ish-zyrtarëve të lartë, të cilët janë përfshirë në dhënien me koncesion të procesit të sterilizimit.
Sipas kësaj nisme, një shërbim publik me kosto të ulët i ishte kaluar një kompanie private duke harxhuar më shumë para nga buxheti i shtetit.
Aso kohe përfaqësuesit e ‘Thurjes’ thanë se kanë kërkuar hetimin e zyrtarëve duke nisur nga ish-ministri i Shëndetësisë Ilir Beqja.
Së fundmi, Prokuroria e Posaçme Kundër Krimit të Organizuar dhe Korrupsionit ka identifikuar 12 personat e akuzuar, të cilët nga 20 janarit do të pyeten në lidhje me kontratën koncesionare të sterilizimit.
Që pas regjistrimit të këtij kallëzimi janë caktuar dy prokurorë të Njësisë së Korrupsionit në SPAK dhe kanë nisur veprimet konkrete.
Personat që kanë firmosur kontratën Partneritet-Publik-Privat do të pyeten të parët.
Më pas do merren në pyetje edhe përfaqësuesit e kompanisë private, përfituese e këtij partneriteti.
Që prej 26 dhjetorit 2019 deri më 16 Janar 2020 nga SPAK dhe GJKKO (Gjykatës së Posaçme Kundër Krimit dhe Korrupsionit) janë 22 persona të arrestuar për korrupsion.
