Edhe pse kanë kaluar 22 vite nga tragjedia e Otrantos, familjarët e viktimave ende nuk e kanë gjetur të drejtën e tyre në instancat e drejtësisë italiane.
Në mars të vitit 1997, në tragjedinë e Otrantos, humbën jetën 58 shqiptarë, të cilët u nisën drejt Italisë për një jetë më të mirë, por fati i tyre i keq u pre në mes nga përplasja e anijeve.
Shqiptarët po udhëtonin drejt Italisë me anijen “Kater i Radës”. Kjo e fundit u godit nga një anije ushtarake italiane, e quajtur “Sibilia”.
Këtë tragjedi, gjykata italiane, e ka quajtur si një incident, në përpjekje për të ndaluar valën e emigrantëve. Prokurori i çështjes, Giuseppe Vignola, vendosi të lirojë nga akuzat kapitenin e “Sibilias”, Laudadio, me pretekstin se fajtor për fundosjen e anijes me shqiptarë, ishte manovra e gabuar e kapitenit të “Katerit”. Megjithatë pamjet filmike të siguruara vërtetojnë komplet të kundërtën, pasi anija italiane, ka çarë në mes “Katerin”.
Sipas familjarëve të viktimave shteti italian i detyrohet atyre mbi 2 milion euro. Ndërkohë Gjykata Administrative e Lecces, ka hedhur poshtë kërkesën e 24 të afërmve të viktimave. Sipas gjykatësit, në prokurat e dorëzuara nga familjarët ka parregullsi në të dhënat e tyre, si emrat apo vendlindja. Për këtë arsye, ministria e Mbrojtjes nuk do të paguajë për viktimat.
Njëri nga të afërmit e viktimave ka kontaktuar redaksinë e JOQ Albania. Ai ka humbur nga tragjedia nënën 40 vjeçe, si dhe dy motrat njëra 11 dhe tjetra 14. Sipas tij Gjykata Administrative e Lecces, po bën çmos që shteti italian të mos paguajë për 25 prej viktimave, me pretekstin se dokumentacionet e paraqitura janë të parregullta.
E ndërkohë që autoritetet italine po bëjnë çdo manovër të mundshme për të shmangur përgjegjësitë dhe detyrimet e tyre për tragjedinë e Otrantos, shteti ynë qëndron sërisht duarkryq, ashtu siç bëri për 30 vite, duke mos mbrojtur interesat e shtetasve të vetë.
