Presidentja e Kosovës, Vjosa Osmani, deklaroi se ka përpjekje për të deformuar historinë e shqiptarëve, ndërsa theksoi se Ushtria Çlirimtare e Kosovës mbetet ideali më i fuqishëm i ndërtuar ndër shekuj. Ajo i bëri këto deklarata gjatë promovimit të librit “Kur heshtja flet” të akademikut dhe ish-ambasadorit Ahmet Shala, i cili trajton gjykimin në Hagë kundër udhëheqjes së UÇK-së.
Ceremonia u mbajt në Prishtinë, në prag të 18 vjetorit të Pavarësisë së Kosovës, me pjesëmarrjen edhe të kryeministrit të Shqipërisë, Edi Rama, i cili ndodhet në një vizitë zyrtare në Kosovë.
Në fjalën e saj, Osmani kujtoi sakrificën e luftëtarëve për liri dhe vlerën e mbrojtjes së së vërtetës historike.
“Në ditët më të errëta patëm bij dhe bija që luftuan për liri dhe treguan se ajo kishte vlerë edhe më shumë se vetë jeta. UÇK është ideali më i fuqishëm i ndërtuar nga shqiptarët ndër shekuj. Për ta mbrojtur të vërtetën duhet ta shkruajmë atë. Ndaj falenderoj autorin e librit ‘Kur Heshtja flet’ që na tregoi se e vërteta jo gjithmonë flet me zë të lartë. Ai sjell të vërtetën e asaj që po ndodh në Hagë, ku kthen heshtjen në zë të fuqishëm”, u shpreh Osmani.
Presidentja theksoi se lufta e UÇK-së ishte një përgjigje ndaj një realiteti të padrejtë dhe shtypjes popullore.
“Lufta e UÇK nuk ishte një akt impulsiv, por përgjigje e një realiteti të pa drejtë dhe shtypje popullore. Ishte luftë për dinjitet mbijetesë dhe për të mbrojtur të pa mbrojturit. Realiteti duhet kuptuar, jo instrumentalizuar nga ata që duan të deformojën historinë tonë”, deklaroi ajo.
Promovimi i librit u shoqërua me mesazhe për ruajtjen e së vërtetës historike dhe përballjen me çdo përpjekje që synon shtrembërimin e saj.
