Gazetari Osman Stafa ka denoncuar një tjetër skandal lidhur me shërbimin Onkologjik në vend, duke akuzuar se ilaçet për kimio mungojnë në spital, por ato shiten kontrabandë pranë Onkologjikut.
Në një postim të tij në Facebook, Stafa thekson se ka prova dhe fakte që vërtetojnë se shumë farmaci përreth QSUT-së dhe më gjerë shesin ilaçe kimio kontrabandë.
Ai pohon se ka biseda të personave që kanë blerë këto ilaçe, por nuk mund të publikojë detaje për shkak të rrezikut për ata që janë të involvuar.
Stafa denoncon se në pesë vitet e fundit mungesat e ilaçeve kimio kanë qenë alarmante, duke krijuar mundësi për kontrabandë. Ai tregon se sekserët hynin edhe në spital dhe kërkonin nga mjekët që të referonin pacientët për të blerë medikamentet.
Sipas gazetarit, pacientët, për shkak të situatës së vështirë, ishin të detyruar të blinin ilaçet, duke paguar jo vetëm për kimion kontrabandë, por edhe një çmim të shtuar për mjekët.
Stafa përmend një shembull konkret, duke shpjeguar se Heceptina kontrabandë blihej për 800 euro, por nëse pacienti nuk ishte i referuar nga mjeku, çmimi mund të ishte më i ulët me 200 euro.
Ai thotë se këto dëshmi do t’i publikojë më vonë, kur të vijë koha. Gjithashtu, ai sjell një rast tjetër ku një pacient ka blerë Goserelinën pranë Onkologjikut, për një çmim të papranueshëm prej 262 mijë lekësh.
Gazetari akuzon mjekët dhe Shefen e Onkologjikut, Silvana Çeliku, për njohjen e këtij fenomeni dhe për mos ngritjen e tij si shqetësim.
Stafa pyet se pse mjekët dhe autoritetet e Onkologjikut kanë pranuar këtë situatë dhe nuk kanë reaguar për të mbrojtur pacientët, duke sugjeruar mundësinë e bashkëpunimit të mjekëve me kontrabandistët.
Ai kërkon shpjegime përse mjekët kanë heshtur për këtë problem dhe se çfarë ndodhi që ata të “bindeshin” të mos flisnin.
