Ditën e sotme, Policia e Tiranës ka vepruar me “dorë të hekurt” duke parandaluar një garë shpejtësie me makina që ishte planifikuar nga 11 drejtues mjetesh në Mullet. Bëhet e ditur se ndaj 11 shoferëve që kishin planifikuar garën e shpejtësisë janë vendosur gjoba deri në 400 mijë lekë të vjetra, për organizimin dhe pjesëmarrjen në këtë aktivitet të paligjshëm. Gjithashtu për tre prej tyre, u vendosën masa dhe për xhamat e zinj të errësuar. 11 personat që kishin planifikuar garën e shpejtësisë në Mullet rrezikonin përdoruesit e tjerë të rrugës.
Njoftimi i policisë së shtetit:
Shërbimet e Komisariatit të Policisë Rrugore Tiranë, në vijim të punës për ndëshkimi e të gjitha shkeljeve të qarkullimit rrugor, që bëhen rrezik potencial për përdoruesit e rrugës, pas konstatimit në rrjete sociale, të disa thirrjeve për gara shpejtësie për automjete tip “Benz”, në rrugën Tiranë-Elbasan, në Mullet, kanë organizuar punën për identifikimin dhe shoqërimin e drejtuesve të automjeteve. Për 11 drejtuesit e automjeteve të konstatuar duke bërë gara shpejtësie u vendosën masa administrative nga 15 000 deri në 40 000 lekë të rinj, parashikuar nga neni 9, i Ligjit Nr. 8378, datë 22.07.1998, të Kodit Rrugor. Krahas masave administrative për gara shpejtësie, për tre prej tyre, u vendosën masa dhe për xhamat e zinj të errësuar.
