Policia e Tiranës ka arrestuar 11 persona të përfshirë në organizimin e lojërave të fatit, ndërsa dy të tjerë janë proceduar dhe një është shpallur në kërkim.
Në operacionin policor të koduar “Big Match”, i organizuar nga Sektori për Hetimin e Krimeve Kibernetike, në bashkëpunim me Sektorin e Forcës për Operacionet Speciale dhe Kërkimin dhe Sektorin e Forcës së Posaçme “Shqiponja”, janë sekuestruar 13 celularë që shërbenin për ushtrimin e lojërave të fatit, 224,000 lekë të rinj dhe 2,720 euro, të dyshuara të përfituara nga kjo veprimtari e paligjshme.
Policia njoftoi se hetimi, i cili filloi në kuadër të një procedimi penal të vitit 2024, u ndjek me metoda speciale të hetimit. Pas një pune hetimore të mirorganizuar, janë identifikuar subjekte dhe shtetas të dyshuar që kryejnë aktivitetin e paligjshëm të organizimit dhe përshtatjes së ambienteve për lotari sportive.
Gjatë kontrolleve në këto subjekte, janë kapur dhe arrestuar në flagrancë shtetasit:
– A. M., 49 vjeç
– A. S., 50 vjeç
– D. S., 48 vjeç
– F. K., 22 vjeç
– H. M., 28 vjeç
– I. S., 46 vjeç
– K. L., 25 vjeç
– Sh. B., 60 vjeç
– K. B., 31 vjeç
– R. Xh., 36 vjeç
– M. D., 21 vjeç
Gjithashtu, janë proceduar në gjendje të lirë shtetasit F. S., 23 vjeç, dhe L. K., 28 vjeç. Në kuadër të këtij operacioni u shpall në kërkim shtetasi I. R., 40 vjeç.
Policia bëri të ditur se gjatë kontrolleve të ushtruara në lokale të ndryshme në Tiranë, të cilat ishin përshtatur për organizimin e lotarive të palejuara, këta shtetas janë kapur në flagrancë duke ushtruar veprimtarinë e paligjshme të lojërave të fatit.
Materialet procedurale i kaluan Prokurorisë, për veprime të mëtejshme.
