Teksa numri i viktimave nga Coronavirusi në gjithë botën ka shkuar në 4,300 viktima dhe numri i të infektuarve në 121,500 persona- Organizata Botërore e Shëndetit ka shpallur pandeminë.
Lajmin e ka dhënë drejtori i Përgjithshëm i OBSH-së, Tedros Adhanom Ghebreyesusm, i cili është shprehur se ky vendim erdhi për shkak të ashpërisë dhe përhapjes së madhe kudo në botë të COVID-19.
“OBSH ka vlerësuar këtë shpërthim të virusit dhe ne jemi të shqetësuar thellësisht si nga nivelet alarmante të përhapjes ashtu dhe ashpërsia, por pa lënë mënjanë edhe nga nivelet alarmante të mosveprimit. Prandaj, ne kemi bërë vlerësimin se Covid-19 mund të karakterizohet si një pandemi,”- tha drejtori i Përgjithshëm i OBSH-së Tedros Adhanom Ghebreyesus.
Ndryshimi mes pandemisë dhe epidemisë është se kjo e fundit është një sëmundje ngjitëse ose virale që prek shumë individë në një zonë të caktuar, ndërsa një pandemie është një sëmundje ngjitëse ose virale që përhapet jashtë vendit në të cilin ka ndodhur shpërthimi.
Në fakt, ditët e fundit situata në Kinë dhe Korenë e Jugut është përmirësuar, pasi janë ulur ndjeshëm të infektuarit dhe shumë të tjerë janë shëruar.
Ndërkohë, alarmante paraqitet situata në Europë, sidomos në Itali ku janë regjistruar 631 viktima dhe mbi 10,149 të prekur, teksa i gjithë shteti është karantinuar.
Në vendin tonë virusi trokiti 3 ditë më parë dhe tashmë janë regjistruar 11 të infektuar dhe 1 viktimë.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
