Interpelanca parlamentare për çështjen McGonigal e kërkuar nga opozita u shoqërua me debate dhe akuza të ashpra ndaj qeverisë dhe kryesisht ndaj kryeministrit Rama. Ky i fundit nuk ishte i pranishëm, ndonëse duhet të ishte tema e diskutimit këtë të enjte, pasi do flitej për marrëdhënien e tij me ish-agjentin e FBI Rama ia delegoi këtë ‘detyrë’ ministres për Marrëdhëniet me Parlamentin, Elisa Spiropalit. Por pas debateve në Kuvend Rama reagoi në lidhje me akuzat ndaj tij përmes një postimi në Twitter. Ai shkruan se skenat në sallën e Kuvendit janë histeri vetëgjyqësie politike.
REAGIMI I RAMES
Kjo është një tallje e madhe dhe e shpifur e politikës pa din e as iman me ata që i shkojnë mbrapa kësaj politike figurash të diskredituara, të cilët duan të mbulojnë diellin me shoshë, ndërkohë që marrëdhëniet tona me SHBA dhe institucionet amerikane janë më të forta se kurrë.
Kush i ka dy fije mend e kupton se ç’është e tërë kjo histeri vetëgjyqësie politike e mediatike, mbi një gjyq në Amerikë për një zyrtar të FBI të cilin drejtësia e nongratave këtu pretendon se është korruptuar nga unë, ndërkohë që drejtësia amerikane s’ka asnjë akuzë a pretendim. Një abuzim total me lirinë e fjalës,me të vërtetën,me publikun,në një dëshpërim total moral, politik, elektoral, ku me shpifje ekstreme synohet manipulimi i opinionit me një çështje të hetuar nga drejtësia amerikane që ka shkuar në gjykatë e që s’ka asnjë lloj lidhje me ne këtu!
