Në emisionin “Open” në News24, gazetarja Klodiana Lala zbardhi detaje nga operacioni i SPAK që përfshiu 21 urdhër-arreste, duke goditur një rrjet kriminal me lidhje të gjera, ku përfshihen ish-funksionarë të drejtësisë dhe policisë.
Sipas Lalës, hetimet u bazuan në të dhënat e dekriptuara nga aplikacionet SKY EÇ dhe informacione të ardhura nga autoritetet belge. Në qendër të operacionit qëndrojnë Suel Çela, i shpallur në kërkim prej 4 vitesh, dhe Bujar Shega, i arrestuar në Milano, i cili dyshohet të jetë truri financiar i organizatës kriminale.
Shega, i cili ka lidhje krushqie me ish-deputetin Aqif Rakipi, akuzohet për pastrim parash dhe trafik droge, ndërsa zotëron dy kompani të regjistruara dhe ka pasur bashkëpronësi me Zihni Demon, babain e kryebashkiakut të Beratit.
SPAK ka lëshuar masa sigurie për të dyshuar të tjerë, përfshirë ish-gjyqtaren Pajtime Fetahu dhe ish-funksionarin Detan Gjoni, të cilët janë arrestuar për lidhje të dyshuara me këtë rrjet.
Lala gjithashtu kritikoi masat ndaj gazetarëve Artan Hoxha dhe Elton Qyno, duke theksuar se goditjet ndaj mediave përbëjnë një kërcënim për gazetarinë investigative. “SPAK duhet të bëjë publike provat që lidhin gazetarët me këtë organizatë kriminale,” përfundoi ajo.
