Katër persona janë arrestuar në Vlorë, pas një operacioni të forcave të rendit që ka zbuluar një aktivitet të paligjshëm të prostitucionit dhe shitjes së lëndëve narkotike.
Policia ka ekzekutuar katër masa sigurie, ku një person është vënë në burg për akuzën e “Prodhimit dhe shitjes së narkotikëve”, ndërsa tre shtetase janë vendosur në arrest shtëpie për përfshirje në prostitucion.
Shtetasi A. T., 39 vjeç, është arrestuar si bashkëpunëtor në shitjen e kokainës dhe kanabisit në dy lokale të ndryshme në Vlorë. Për të, gjykata vendosi masën e arrestit në burg.
Ndërkohë, shtetaset J. B. (40 vjeçe), O. A. (27 vjeçe) dhe E. H. (28 vjeçe), u vendosën në masën e arrestit në shtëpi. Hetimet tregojnë se A. T. furnizonte këto shtetase dhe klientët e tyre me lëndë narkotike, kryesisht kokainë, ndërkohë që J. B. dhe O. A. shfrytëzonin edhe E. H. për të ushtruar prostitucion.
Policia vijon hetimet për zbardhjen e plotë të aktivitetit dhe identifikimin e individëve të tjerë të përfshirë në këtë aktivitet kriminal.
