Një sherr mes dy familjeve në Ksamil ka përfunduar me plagosjen e tre personave, njëri prej të cilëve në gjendje të rëndë.
Familjet Pollo e Ziflaj janë konfliktuar për motive pronësie dhe anëtarët e dy familjeve kanë përdorur thika e mjete të forta duke goditur njeri-tjetrin, derisa në vend kanë shkuar efektivë të policisë së Sarandës dhe një grup i FNSH-së dhe dy persona janë shoqëruar në Komisariatin e Sarandës, ndërsa tre të tjerë po marrin mjekim në spital.
Njëri prej të plagosurve pritet që të niset drejt Tiranës për mjekim më të specializuar, teksa policia po vijon hetimet për zbardhjen dhe dokumentimin e plotë të ngjarjes.
Kujtojmë se një konflikt familjar ndodhi edhe në Korçë, një ditë më parë, ku nipi plagosi me thikë tezen dhe burrin e tezes.
Javët e fundit, në vendin tonë janë regjistruar edhe ngjarje të tjera të rënda, pikërisht prej konflikteve të pronësisë.
Një 50-vjeçar nga Shkodra u plagos në dorë dhe në qafë në afërsi të urës së Bunës, duke përfunduar në reanimacion, ndërsa dy persona u vranë në Lezhë, ku shkak ishte bërë pikërisht një konflikt pronësie, teksa sherre e vrasje të shumta janë raportuar ndër vite për këtë çështje në vendin tonë.
LEXO: Konfliktet e pronësisë “po vrasin shqiptarët”! Zbardhet dinamika e plagosjes në Shkodër
