PD duhet të mbledhë rreth vetes dhe ata që janë larguar,-deklaroi ish-deputeti Gazmend Oketa në një intervistë televizive.
“Një nga arsyet qe vendosa të angazhohesha sërish në politikë është se gjykoj se vendi ka nevojë për rrotacion politik. Partia Demokratike duhet të grumbullojë rreth vetes energjinë, forcën dhe kontributin e çdo individi madje kam kurajën të them edhe të atyre që janë larguar nga PD, nuk po i përmend me emra”, deklaron Oketa.
Ish-deputeti Gazmend Oketa u shpreh se ka tjetërsim votash në procesin e numërimit, sidomos te partitë e vogla.
“Unë bej pjesë e listës së Durrësit dhe pastaj do të jetë vendimmarrje e kryesisë së PD-së. Unë nuk bëj avokatinë e politikës shqiptare, por nuk bëj pjesë tek ata që nxijnë gjithçka.
E pranoj se ka tjetërsim votash në procesin e numërimit, sidomos te partitë e vogla. Për mua, sistemi më i mirë i testuar deri më sot është ai i para vitit 2008”, tha Oketa.
Oketa u shpreh se nuk ka besim te administrimi i zgjedhjeve.
“Nuk kam besim të plotë tek administrimi i zgjedhjeve, pasi së pari e ka bërë Damian Gjiknuri. I gjithë procesi i ndryshimeve kushtetuese dhe kodit zgjedhor, si dhe rrëzimin e dekretit të presidentit për gjendjen civile, ngrenë shumë pikëpyetje.
Po ashtu kemi dy çështje ose dosje të hapura me vjedhjen e votave. Deri më tani nuk kemi një zbardhje nga SPAK apo nga prokuroria për këtë çështje. Këto të bëjnë që të jesh pak optimist se si do të administrohen zgjedhjet.
Pavarësisht këtyre dyshimeve, kam besim se do të ketë rrotacion politik në 25 prill. Vota e qytetarëve do ta kalojë edhe votën e opozitës së bashkuar”, shprehu Oketa.
/GazetaReforma.com/
