Ka nisur mbledhja e jashtëzakonshme e Këshillit të Sigurimit të OKB-së për zhvillimet në Lindjen e Mesme. Kjo mbledhje vjen më kërkesë të Benjamin Netanyahut pas sulmit të Iranit ndaj Izraelit.
Sekretari i Përgjithshëm i OKB-së Antonio Guterres ka deklaruar se Lindja e Mesme është në “limit”, teksa popujt e rajonit përballen me rrezikun real të një konflikti katastrofik në shkallë të plotë.
“Është koha të tërhiqemi nga terreni i vështirë ku situata ndodhet momentalisht. Është jetike të shmanget çdo veprim që mund të çojë në konfrontime të mëdha ushtarake në fronte të shumta në Lindjen e Mesme. Civilët tashmë po mbajnë barrën e situatës dhe po paguajnë çmimin më të lartë.
Ne kemi një përgjegjësi të përbashkët për të angazhuar në mënyrë aktive të gjitha palët e interesuara për të parandaluar përshkallëzimin e mëtejshëm. Ne kemi një përgjegjësi të përbashkët për të siguruar një armëpushim të menjëhershëm humanitar në Gaza, lirimin e menjëhershëm dhe të pakushtëzuar të të gjithë pengjeve dhe shpërndarjen e papenguar të ndihmave. Ne kemi një përgjegjësi të përbashkët për të ndaluar dhunën në Bregun Perëndimor të pushtuar, për të de-përshkallëzuar situatën përgjatë Linjës Blu dhe për të rivendosur lundrimin e sigurt në Detin e Kuq. Ne kemi një përgjegjësi të përbashkët për të punuar për paqen. Paqja dhe siguria rajonale dhe në të vërtetë globale po minohen çdo orë. As rajoni dhe as bota nuk mund të përballojnë më shumë luftë”, tha ai.
