Asambleja e Përgjithshme e OKB-së miratoi rezolutën që shpall 11 korrikun Ditë Ndërkombëtare të Përkujtimit të Viktimave të Gjenocidit në Srebrenicë.
Asambleja pati një debati, i cili u hap nga ambasadorja e Gjermanisë në OKB, Antje Leendertse, e cila theksoi qëllimin e rezolutës: “Rezoluta nuk është e drejtuar kundër askujt, as kundër Serbisë. Ajo shënjestron vetëm autorët e gjenocidit.”
Presidenti i Serbisë, Aleksandar Vuçiç, i bëri thirrje shteteve anëtare të votojnë kundër, duke e quajtur rezolutën “shumë të politizuar” dhe duke theksuar se “nuk do t’i kontribuojë pajtimit në Bosnje e Hercegovinë, as në rajon.” Ai shtoi se rezoluta “do të hapë Kutinë e Pandorës” dhe do të krijojë ndarje.
Rezoluta parashikon dënimin pa rezerva të çdo mohimi të gjenocidit në Srebrenicë dhe të veprimeve që i madhërojnë të dënuarit për krime lufte. Gjenocidi në Srebrenicë ndodhi në korrik të vitit 1995, ku forcat serbe vranë mbi 8,000 burra dhe djem boshnjakë. Ky krim u njoh si gjenocid nga Gjykata Ndërkombëtare e Drejtësisë në vitin 2007.
Gjermania dhe Ruanda janë shtetet që kanë hartuar tekstin e rezolutës dhe kanë qenë sponsorë kryesorë. Më pas, 32 shtete anëtare të OKB-së u bashkuan si bashkësponsorë. Për miratimin e rezolutës, nevoiteshin votat e shumicës së anëtarëve të Asamblesë së Përgjithshme, pra 97 vota nga 193 anëtarët.
Rezoluta përfshin masa të ndryshme, duke kërkuar nga shtetet anëtare të ruajnë faktet e vërtetuara mbi gjenocidin dhe të zhvillojnë programe arsimore për parandalimin e mohimit dhe shtrembërimit të tij. Gjithashtu, bën thirrje për vazhdimin e ndjekjes penale të autorëve të gjenocidit që ende nuk janë përballur me drejtësinë, dhe kërkon nga të gjitha shtetet që t’i përmbahen detyrimeve të tyre sipas Konventës për Parandalimin dhe Ndëshkimin e Krimit të Gjenocidit.
