Mbrëmjen e djeshmë një ngjarje e rëndë ka ndodhur në Elbasan, pasi është dhunuar në mënyrë barbare kancelari i gjykatës së Elbasanit.
Ndërkohë 12 orë nga ngjarja ende në vendin ku ndodhi sulmi mund të shihen njolla gjaku. Ndonëse policia e Elbasanit ka dyshime se sulmi ndaj zyrtarit ka ndodhur per shkak të detyrës ai nuk ka bashkëpunuar me blutë.
51-vjeçari ka refuzuar të tregojë detaje mbi ngjarjen, gjë e cila bën që policia të mendojë se ai ka njohur shumë mirë personat që e kanë dhunuar barbarisht me levë dhe mjete të tjeratë forta.
Gjithsesi policia e Elbasanit nuk përjashton pistën që kancelari të jetë qëlluar edhe për arsye personale ndaj është duke vijuar hetimet mbi ngjarjen.
Theksojmë se fillimisht grupi hetimor ka sekuestruar kamerat e sigurisë në zonë, ndonëse ndricimi me led në lagjen muzeale e bën të vështirë identifikimin e dy agresorëve. Disa persona janë shoqëruar deri tani ku pasi janë pyetur mbi ngjarjen janë lënë të lirë. Një burim i cili ka parë nga afer ngjarjen mbrëmë sqaron për “Fax News” se dy personat kane parkuar mjetin në hyrje të rrugës Egnatia.
Me hap të shpejtë kanë arritur 51 vjecarin dhe kanë nisur ta godasin menjëherë me mjete të rënda në kokë dhe trup duke i lënë plagë të rënda.
Më pas me shpejtësi i janë drejtuar mjetit duke u larguar menjëherë nga vendi i ngjarjes. Në këto momente Sulkuqi është dëgjuar të rënkojë “ Oh moj nëna ime”.
Duke dashur ti shpëtojë kalimtarëve pasi eshte banues në lagjen “Kala” i gjakosur është ngritur në këmbë dhe është fshehur në rrugicën më të afërt ku duken ende të freskëta njollat e gjakut.
Gjëndja e rëndë shëndetësore ka bërë që ai ti drejtohet spitalit të Elbasanit për mjekim, ku raportohet se pas marrjes së ndihmës mjekësore është jashtë rrezikut për jetën. Ka qënë spitali i Elbasanit i cili ka njoftuar policinë.
I vëmë theksin faktit se sulmi ndaj Z Sulkuqi ka ndodhur vetëm disa metra larg drejtorisë vendore të policisë Elbasan dhe disa ditë nga zhdukja e sekretares së gjykatës në Lezhë.
