Ramzan Kadyrov, lideri i Çeçenisë ëshë përfolur shumë kohët e fundit në lidhje me “daljen e tij në pension”, thashetheme që ai vetë i nxorri dhe vetë i hodhi poshtë. Kadyrov pas ofensivës së ushtrisë ukrainase ka kritikuar udhëheqjen e ushtrisë ruse pasi u duk se u kap në befasi nga lufta e Ukrainës në veri-lindje.
Në shenjë se Kremlini mund të përballet me pasoja serioze për humbjen e territorit që administratat pushtuese ruse kishin deklaruar vazhdimisht se planifikonin ta mbanin “përgjithmonë”, Kadyrov sugjeroi gjithashtu se Vladimir Putin mund të mos ishte në dijeni të gjendjes reale, shkruan The Guardian.
“Ata kanë bërë gabime dhe mendoj se do të nxjerrin përfundimet e nevojshme”, tha Kadyrov në një mesazh audio të postuar në kanalin e tij Telegram të dielën.
“Nëse sot apo nesër nuk bëhen ndryshime në strategji, unë do të detyrohem të flas me udhëheqjen e ministrisë së mbrojtjes dhe me udhëheqjen e vendit për t’u shpjeguar situatën reale në terren. Është një situatë shumë interesante. Është befasuese, do të thosha”, citohet të ketë thënë Kadyrov, një ish-rebel i kthyer në aleat të Kremlinit që sundon Çeçeninë – një republikë ruse në Kaukaz – me një grusht të hekurt dhe ka një forcë paraushtarake në komandën e tij.
Reagimi i tij vjen në kohën kur trupat ukrainase kryen me sukses kundërsulmin e tyre të shpejtë në pjesën verilindore të vendit, duke detyruar njësitë ruse të tërhiqen.
Veprimi i shpejtë i Ukrainës për të rimarrë zonat e pushtuara nga Rusia në rajonin verilindor të Kharkiv-it i detyroi trupat e Moskës të tërhiqen në një përpjekje për t’i parandaluar ato “të rreshtohen” dhe të lënë pas një numër të konsiderueshëm armësh dhe municionesh në një tërheqje të nxituar ndërsa lufta shënoi 200 ditë të dielën.
Madje presidenti i ngazëllyer ukrainas Volodymyr Zelensky tha në një fjalim video të shtunën vonë, duke thënë se “ushtria ruse në këto ditë po demonstron më të mirën që mund të bëjë – duke treguar shpinën”.
