Ditën e sotme në Kosovë janë regjistruar 13 raste të reja me koronavirus, duke e çuar numrin e përgjithshëm në 125 të prekur.
Ndërsa, deri më tani, 10 persona janë shëruar, katër prej të cilëve janë shëruar vetëm sot.
Deri tani në Kosovë është regjistruar vetëm 1 viktimë- një 82 vjeçar ndërroi jetë disa ditë pas goditjes së vendit nga COVID-19 dhe kështu, së bashku me Malin e Zi, Kosova është vendi me shkallë më të ulët të vdekshmërisë në rajon.
Mirëpo, duket se kriza politike ka bërë që situata të mos marrë vëmendjen e duhur, teksa parashikohet se këto ditë me rezultate të mira mos të zgjasë përgjithmonë dhe se situata mund të përkeqësohet.
Drejtori ekzekutiv i Programit të Emergjencës të Organizatës Botërore të Shëndetësisë, Michael Ryan ka thënë se sistemi shëndetësor në Kosovë është ende në gjendje të vështirë, teksa ka bërë thirrje të ndërmerren hapa në rast se situata eskalon.
“Kosova dhe Shqipëria janë pas ujit, afër me Italinë, një prej vendeve më të prekura nga pandemia në botë dhe është shumë me rëndësi që vendet e Ballkanit, në veçanti Kosova duhet të ndërmarrë hapa të shpejtë që të jetë e gatshme të përballojë situatën me virusin pasi mund të përkeqësohet.Për fund përshëndetjet më të ngrohta nga unë për kolegët në Kosovë”, është shprehur Ryan sot në një përgjigje për Gazetën Shneta.
Ryan gjithashtu ka treguar se ka qëndruar për disa muaj në Kosovë për të ndihmuar në ndërtimin e sistemit shëndetësor.
“Kosova është një vend që ka dalë prej një situate të vështirë dhe tani është duke rindërtuar sistemit e ofrimit të shërbimeve. Kam qenë për disa muaj në Kosovë për të ndihmuar ndërtimin e sistemit shëndetësor”.
Ai më tej ka deklaruar se Kosova duhet të ketë një sistem aktiv të identifikimit të rasteve dhe të shtojë mundësitë për të përballuar situatën.
