503,274 të infektuar dhe 22, 342 viktima në 199 vende, ky është bilanci i deritanishëm nga COVID-19 që ka pushtuar botën prej muajsh.
Tashmë epiqendra e pandemisë është zhvendosur në Europë, ku numri i viktimave dhe të prekurve po rritet dita-ditës, por sipas deklaratës së fundit të OBSH nuk është arritur ende kulmi, teksa pritet që epiqendra e ardhshme të jetë SHBA.
“Megjithëse situata mbetet shumë serioze, ne kemi filluar të shohim shenja inkurajuese. Në Itali numri i rasteve është ulur paksa, por është shumë herët të thuhet se pandemia ka arritur kulmin.“- është shprehur Hans Kluge, drejtori i seksionit europian i Organizatës Botërore të Shëndetit.
Deri tani Italia renditet e para për numrin e viktimave me 7,503 të vdekur dhe mbi 75,000 të infektuar dhe pas saj renditet Spanja me 4,145 viktima.
OBSH ka vlerësuar punën e qeverisë italiane përgjatë këtyre ditëve të trishta ku bilanaci i vikimave dhe të infektuarëve ka qenë i frikshëm, kurse Michael Ryan, drejtori ekzekutiv i OBSH i programit të emergjencës EMS, ka shprehur vlerësimin për mjekët italianë duke i quajtuar ata heronj.
Ditën e sotme ka shkuar në 174 numri i të prekurve nga koronavirusi, pasi vetëm në 24 orët e fundit janë shënuar 28 raste të reja nga 103 testime, rritja më e madhe që nga fillimi i epidemies në vendin tonë.
Hartës së qyteteve të prekura tashmë i është shtuar edhe Tropoja, ku janë shënuar 2 raste, ndërsa në Spitalin Infektiv janë shtruar 73 persona, tre prej të cilëve në terapi intensive, ku dy prej tyre janë intubuar.
Në mesin e të prekurve janë edhe 4 fëmijë, gjendja e të cilëve është e stabilizuar.
Shpërndarja gjeografike e rasteve pozitive, është si vijon:
– Tiranë 102 raste
– Durrës 10 raste
– Lushnje 4 raste
– Elbasan 5 raste
– Rrogozhinë 2 raste
– Fier 18 raste
– Kavajë 4 raste
– Korçë 11 raste
– Vlorë 5 raste
– Shkodër 3 raste
– Lezhë 4 raste
– Berat 1 raste
– Has 2 raste
– Krujë 1 raste
-Tropojë 2 raste
