Prej disa ditësh, banorët e Astirit kishin rënë në qetësi, pasi për shumë muaj ata protestuan në afërsi të mbikalimit te “Pallati me Shigjeta”, kundër projektit të Unazës së Re që po u prish banesat e bizneset e tyre.
Nisur nga mbrëmja e djeshme, banorët e Astirit kanë dalë sërish në rrugë për të protestuar kundër prishjes së banesave të tyre.
Banorët janë njoftuar se sërish do të kishte një aksion për prishjen e banesave të tyre. Kjo ka sjellë edhe revoltimin e tyre.
Mëngjesin e sotëm rruga është bllokuar nga banorët dhe nga numër i madh policësh bashkiakë, pasi pritet që disa banesa pa leje të prishen në kuadër të projektit të Unazës së Madhe, për t’u bashkuar edhe me rrugën që lidh Astirin me Kasharin.
Banorët që po protestojnë janë shprehur para kamerave se mbi ta po ushtrohet presion dhe se e gjitha është një lojë e bashkisë së Tiranës dhe qeverisë. Sipas tyre banorët e banesave pa leje kanë rënë dakort që ato të prishen pasi presioni ka bërë punën e vet.
Asnjë prej pronarëve të banesave që pritet të prishen sot nuk e ka kundërshtuar aksionin e Bashkisë së Tiranës, madje ata po heqin vetë dhe materialet e vlefshme nga ndërtesat.
Ndërsa një banor i revoltuar është shprehur para mediave se kjo histori do të përfundojë me viktima, pasi ata po kërkojnë vetëm drejtësinë e tyre.
“Te Unaza e Re nuk keni asnjë lloj shansi t’i prishni. Ne jemi për shtëpitë tona. O të na vrasin ata o do i vrasim ne, kështu do të përfundojë. Ne do të bëjmë kufoma në pragun e shtëpisë tonë. Duam drejtësinë tonë”, është shprehur në këtë mënyrë një banor i Astirit i cili ka dalë të protestojë.
