Nga 9 marsi e deri tani në vendin tonë janë identifikuar 766 të infektuar, nga të cilët 455 janë shëruar, teksa mbrëmjen e sotme ka shkuar në 31 numri i viktimave.
Sipas ekspertëve vendi ynë ka arritur ta menaxhojë shumë mirë pandeminë, mirëpo sipas tyre lehtësimi i masave do vijojë në mënyrë graduale.
Së fundmi, në një lidhje në emisionin “Opinion”, kreu i Urgjencës Kombëtare Skënder Brataj, deklaroi se hapje duhet të kryhet me faza, nisur edhe nga fakti që inkubacioni i virusit është një periudhë të paktën dy javore.
Ndonëse për një pjesë të shqiptarëve, masat ekzistuese janë të ekzagjeruara, Brataj tha se ka qenë pikërisht efekti i tyre që solli në këtë rezultat dhe se nuk dëshiron të gjendet në situatën që të zgjedhë cilin pacient do shpëtojë.
“Inkubacioni është dy javë, ndaj dhe fazat e lirimit janë me afat dy javor, nuk mund të kemi hapje të menjëhershme. Unë si mjek nuk dua të gjendem asnjëherë në situatën që të zgjedh kë do shpëtoj. Ndoshta ne jemi në një moment që shumë kushte na favorizojnë dhe do të lehtësohen masat”, tha Brataj.
Lidhur me faktin se vaksinimi kundër tuberkulozit i popullsisë së vendit tonë ka ndikuar që kurba të jetë e menaxhueshme dhe jo në nivele të larta, numri 1 i Urgjencës tha se është ende herët për konkluzione.
“Ne flasim me çfarë njohim, ato janë të gjitha hipoteza. Përgjithësisht Ballkani ka një infektivitet më të ulët se sa Europa dhe bota. Çdo virus që del krijon edhe shtamet ose mutacionet. Derisa nuk e kemi të faktuar, unë mendoj që është një faktor, por mendoj se masat e marra e ndikuan këtë kurbë.”
