Bëhen publike detaje të reja mbi skandalin e radhës, nxjerrjen e databazës me 3 milion numra celularësh dhe të dhëna mbi poseduesit e tyre. Kjo është një tjetër thyerje e të dhënave personale pas daljes së databazës së pagave dhe targave të shqiptarëve.
Kësaj here të dhënat janë publikuar në një faqe në internet e cila disponon ka nxjerrë në shitje një database me 3 milion numra celularësh, së bashku me emrat e përdoruesve të këtyre numrave dhe pozicionin e punës të personit që i përket numri telefonit. Poseduesi dhe shitësi i 3 milion numrave telefonik të shqiptarëve është një person i cili përdor emrin Munnaf Hossain. Sipas tij lista që ai ka nxjerrë në shitje është e saktë, autentike, e freskuar me informacione korrekte. Për ta vërtetuar këtë Munnaf Hossain ka publikuar në faqen e tij në internet si shembull një pjesë të kësaj database.
Ai gjithashtu ka listuar edhe çmimet e shitjes së të dhënave. Ato variojnë nga 350 dollarë për 100 mijë numra deri në 4.000 dollarë për paketën e plotë 3 milion numra. Çmimet janë për të gjitha shtresat, ndaj nuk lënë jasht dhe atë të mesmen, e cila me 1.500 dollarë mund të blejë të dhënat e 1 milion numrave dhe me 1.000 dollarë për 500 mijë numra Mjafton të kesh një kartë banke dhe në pak sekonda bëhesh posedues i tyre.
Mbetet e paqartë se si Munnaf Hossain ka mundur të sigurojë 3 milion numrat e celularëve të shqiptarëve në një kohë kur ligji parashikon në mënyrë strikte se kush duhet t’i disponoj këto numra dhe dënon këdo që kryen publikimin e tyre, pasi është shkelje e privatësisë.
Në listën e publikuar si shembull për blerësit, është edhe emri ekspertit të sigurisë Redion Qirjazi i cili tha për Top Channel se “gjetja e fajtorit mbetet gjithmonë sfida më e madhe në kërcënimet e sigurisë kibernetike”.
“Kjo mund të nxisë kërkesën e qytetarëve për të mos regjistruar të dhëna personale ose akoma më keq, të synojnë forma te jashtëligjshme për zotërimin e një numri celulari. Në terma afatgjatë kjo mund te krijojë një situatë pasigurie për qytetarët dhe qeverinë, që do ta kishin të pamundur të identifikonin thirrësit, në raste të veprimeve kriminale ndaj individëve të tjerë, shoqërisë apo dhe qeverisë”, deklaroi eksperti Redion Qirjazi.
Në Shqipëri legjislacioni është përmirësuar në lidhje me shitjen e numrave, por kjo duket se ka ngelur vetëm në letër pasi siç shihet numrat kanë dalë sheshit.
“Nëse rrjedhja e këtyre numrave është bërë nga punonjës së institucioneve të sigurisë që janë të autorizuar për të pasur akses, kjo do të dëmtonte imazhin e institucioneve dhe krijonte ndjenjë pasigurie tek qytetarët”, tha Redion Qirjazi.
Sipas ekspertit Qirjazi, kjo do të sjellë uljen e besimit tek institucionet të cilat kanë akses në numrat e celularëve të shqiptarëve, të cilat tashmë janë në shitje.
