Policia ka vijuar me kontrollet për zbatimin masave të vëna nga qeveria për parandalimin e COVID-19.
Në 24 orët e fundit, janë ndëshkuar 8 shoferë me heqje patente dhe bllokim të mjetit.
Gjithashtu janë gjobitur me 10 mijë lekë 157 shtetas, të cilët u konstatuan duke lëvizur në këmbë apo me biçikleta, pa arsye emergjence.
Njëkohësisht është ndëshkuar me 500 mijë lekë një shtetas, pasi u fut pa leje në ambjentet e urgjencës mjekësore, për të parë familjarin e tij.
Gjoba janë aplikuar edhe për 7 njësi tregtie, që nuk zbatuan orarin e mbylljes.
Që nga dita e sotme ndërkohë, qytetarët duhet të aplikojnë në portalin e-albania për të dalë për të blerë ushqime dhe vetëm një person nga familja e ka të drejtën brenda 24 orëve.
Njoftimi i policisë
Policia e Shtetit
Vijojnë kontrollet në të gjithë territorin, në zbatim të masave kufizuese të shpallura nga qeveria shqiptare, për vënien në kontroll të pasojave që sjellin përhapjen e COVID-19.
Gjatë 24 orëve të fundit, në të gjithë vendin, janë evidentuar 8 drejtues mjetesh që kanë shkelur urdhrin e ndalim qarkullimit, të cilët janë ndëshkuar me heqje të lejes së drejtimit dhe bllokim mjeti, në zbatim të Aktit Normativ Nr. 3, datë 15.03.2020 ”Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga virusi COVID-19″.
Në të gjithë vendin, nga strukturat e Policisë janë ndëshkuar me masë administrative 10.000 lekë, 157 shtetas, të cilët u konstatuan nga shërbimet e Policisë duke lëvizur në këmbë apo me biçikleta, pa ndonjë arsye apo emergjencë.
Është ndëshkuar me masë administrative 500 000 lekë, 1 shtetas, pasi është futur pa leje në ambientet e urgjencës mjekësore, për të parë familjarin e tij.
Në të gjithë vendin janë konstatuar 7 njësi tregtie që nuk kanë zbatuar orarin e mbylljes dhe ndaj administratorëve është marrë masa administrative, në bazë të nenit 3, pika 7 e Aktit Normativ Nr. 3, datë 15.03.2020.
Nga sot e në vazhdim nuk do të lejohet asnjë këmbësor të dalë për shëtitje, aktivitet sportiv apo për motive të tjera, përveç emergjencave mjekësore dhe atyre që shkojnë në punë, të cilët duhet të kenë me vete kartën e identitetit dhe vërtetimin e punës nga punëdhënësi.
Për të bërë pazar në qendrat urbane, një pjesëtar i familjes duhet të aplikojë në e-Albania apo në numrin falas 55155, për t’u pajisur me autorizim, ndërsa pensionistët nuk lejohen në mënyrë kategorike të dalin nga banesa.
Shërbimet e Policisë, nëse do konstatojnë këmbësorë me mungesë të email-it apo mesazhit konfirmues nga e-Albania, do të aplikojnë gjobat ndaj tyre.
Policia e Shtetit apelon për të gjithë qytetarët që të respektojnë masat kufizuese, për të bërë të mundur parandalimin e përhapjes së COVID-19.
Aktualisht në vendin tonë, numri i të prekurve nga COVID-19 ka shkuar në 223.
Nga këto 44 pacientë janë shëruar ndërsa 11 kanë ndërruar jetë.
Në 24 orët e fundit, u shënuan 11 raste të reja nga 90 testime të kryera.
