Një ngjarje dramatike u regjistrua në malin Etna në Siçili, ku vullkani më aktiv në Evropë shpërtheu ditën e djeshme, duke krijuar panik mes banorëve dhe turistëve.
Paolo Turnaturi, guidë vullkanologjike në Katania, ka ndarë eksperiencën e tij nga momentet e tensionuara kur ai dhe kolegët e tij ndodheshin pranë kraterit në çastin e shpërthimit.
“Isha me kolegët e mi dhe kuptuam se stabiliteti i kraterit nuk ishte i fortë derisa frakturat u hapën dhe bënë që të shembej një pjesë e madhe e kraterit. Papritur u gjendëm të përfshirë nga shpërthimi që zbriste nga lart, por patëm mundësi për tu arratisur”, tha Turnaturi për mediat italiane.
Shpërthimi shoqërohej me një re të dendur hiri dhe tymi që bllokoi pamjen në të gjithë zonën. Turnaturi kujton se ishte pikërisht mungesa e dukshmërisë që e bëri situatën edhe më të rrezikshme.
“Frika ishte gjatë arratisjes sepse nuk kuptohej se cili do ishte drejtimi i hirit të ndezur. Më vonë dukshmëria përreth ishte zero, pasi nuk shihnim dot se ku vendosim këmbën. Nga eksperienca gjetëm shtegun e duhur për t’u larguar. Frika është e nevojshme në këto raste sepse të mban të kthjellët,” theksoi ai.
Guida vullkanologjike thekson gjithashtu se krateri juglindor i Etnas është një nga pikat më të brishta dhe të rrezikuara për shpërthime të reja. Sipas tij, kjo situatë ishte parashikuar prej vitesh.
“Në këtë moment që flasim, nga këndvështrimi strukturor, krateri juglindor është një nga pikat më të brishta ku mund të përsëritet shpërthimi. Prisnim që kjo të ndodhte prej 15 vjetësh pasi prej 2011-tës, Etna ka hyrë në një proces ndryshimi strukturor ndaj dhe këto janë të zakonshme në një vullkan. Dridhjet e tokës tregojnë që nuk ka stabilitet, por mbeten brenda normave”, sqaroi Paolo Turnaturi.
Fatmirësisht, nuk raportohet për të lënduar, ndërsa autoritetet vijojnë të monitorojnë situatën për çdo zhvillim të mëtejshëm.
