Detaje të reja kanë dalë në dritë lidhur me atentatin e rëndë që ndodhi një natë më parë, ku katër persona mbetën të plagosur.
Një nga të përfshirët në ngjarje, badigardi Arenc Stafa, i cili ishte duke drejtuar mjetin në momentin e sulmit, është marrë në pyetje nga policia. Ai ka deklaruar se nuk ka asnjë konflikt personal dhe se gjatë lëvizjes nuk ka vënë re asgjë të dyshimtë.
Sipas dëshmisë së tij, ai po shoqëronte fëmijët nga Durrësi, ku kishin marrë pjesë në një festë, drejt banesës, dhe për herë të parë kishte ndjekur një itinerar tjetër për të shmangur trafikun, duke kaluar nga rruga e Lundrës.
Në automjetin që ai drejtonte u gjet një armë zjarri, pistoletë me leje, që i përkiste kompanisë së sigurisë ku është i punësuar.
Nga të dhënat e deritanishme, rezulton se atentati është kryer nga dy autorë që lëviznin me motoçikletë. Pas të shtënave, ata janë larguar në drejtim të panjohur dhe deri më tani, policia nuk ka asnjë informacion konkret për identitetin apo vendndodhjen e tyre.
Hetimet vazhdojnë, ndërkohë që pista e ngatërrimit të shënjestrës mbetet një nga versionet kryesore që po shqyrtohet nga hetuesit.
