Deputeti i Partisë Konservatore, Kujtim Gjuzi është shfaqur i revoltuar në seancën e parë parlamentare, të zhvilluar pas zgjedhjeve të 25 prillit. Gjuzi ka deklaruar se koalicioni ku po garonte nuk i njeh këto zgjedhje. Gjithashtu Gjuzi është shprehur se deputetët aktual të opozitës parlamentare janë më të mirët. Ndër të tjera Gjuzi ka thënë se kryeministri aktual i vendit Edi Rama, kërkon të shkarkojë Metën pasi do të bëhet vetë President i Republikës. “Yuri Kim jep mbështetje pa dalë rezultati për PS. Parti kriminale. Një komisioner që nuk lejon emigrantët të votojnë. Prandaj ne jemi këtu, ishim këtu, jemi më të mirët e më të mirëve nga ata që kanë qenë në parlament. I themi Ramës se ne nuk i njohim zgjedhjet. I bëj ftesë 3 kolegëve të mi deputetë që ishim në koalicion. 7 shoqatave mos njohin këtu zgjedhje. Rama do të bëhet President prandaj kërkon të shkarkojë Metën. Nëse Presidenti ka bër shkelje i ka bërë në 2017. Tani ka shkelur të drejtën sepse ka ofenduar apo ka thënë diçka për ambasadën amerikane. Nëse Presidenti është i sëmurë, e ftoj të shkojmë në spitalin psikiatrik dhe të shohim është në rregull Presidenti apo Kujtim Gjuzi”, tha Gjuzi.
Edhe deputeti i opozitës parlamentare Selami Jenisheri ishte në linjën e Kujtim Gjuzit. Jenisheri ka hedhur edhe akuza të forta duke thënë se bankat kanë shpërndarë lekë në kundërshti me shtetin.
“Janë bërë shkelje të turpshme. Bankat i shpërndajnë lekët, në kundërshtim me shtetin, në Durrës janë bërë kushedi sesa. Koaliconi jonë do të jetë në krah të popullit, do ti drejtohemi organeve të drejtësisë që këto zgjedhje janë të paligjshme, antikushtetuese. Ju nuk meritoni me qene as qytetarë të Republikës së Shqipërisë, nuk e meritoni as të jeni këtu.”, tha deputeti.
