Ditën e sotme te Krimet e Rënda u zhvillua me orë të tëra, seanca ndaj ish-ministrit të Brendshëm, Saimir Tahiri.
Ky i fundit edhe pse ishte i shoqëruar nga avokati i tij, Maks Haxhia, vendosi që të mbrohej vetë.
Fillimisht organi i akuzës kërkoi 12 vjet heqje lirie për Tahirin, i cili do të përfitojë uljen me 1/3 të dënimit, për shkak të gjykimit të shkurtuar.
Ish-ministri surprizoi të gjithë në sallë, teksa rrëzoi një nga një të gjitha akuzat e ngritura ndaj tij.
Pasi kërkoi pushim, organi i drejtësisë vendosi që të ndërpresë seancën, duke e shtyrë atë për në datën 19 shtator në orën 09:00 të mëngjesit, shkruan “Faxweb”.
Gjatë seancës, Tahiri paraqiti një sërë provash, të cilat sipas tij vërtetojnë se ai dhe ish-drejtori i Policisë së Vlorës, Jaeld Çela, kanë kërkuar nisjen e procedimit penal për Habilajt.
Gjithashtu ai tregoi një shkresë sekrete, ku i kërkonte llogari ministres së Mbrojtjes në atë kohë Mimi Kodhelit, për fikjen e radarëve të ushtrisë në ishullin e Sazanit.
Ish-ministri bëri publik edhe një email të Gjergj Kohilës, një ish-zyrtari në policinë e Vlorës, për Habilajt, të cilin ia kishte dërguar prokurorit të çështjes, Dritan Prençit.
Ky i fundit nuk bëri asnjë hap në atë kohë dhe e referoi çështjen shumë vonë.
Tahiri ka gjetur kohë të thumbojë edhe ministrat aktual të qeverisë për faturat e shtrenjta, duke thënë se në kohën e tij, çmimi më i lartë që ka paguar ka qenë 140 euro.
