Kryeministri Edi Rama ishte i ftuar mbrëmjen e sotme në ReportTv ku foli për situatën e pandemisë, politikën në vend dhe jo vetëm. Në lidhje me një karantinë të dytë pas rritjes së madhe dhe të shpejtë të rasteve me COVID-19 kryeministri u shpreh se nuk ka në plan që të firmos ndonjë urdhër për të mbyllur sërish qytetarët në karantinë. Pasi nuk ka sens dhe qytetarët duhet të kuptojnë se po jetojnë një normalitet të ri dhe nuk duhet të sillen si më parë.
“Kjo nuk është dicka që do të mbarojë kur të dalim nga shtëpia, ne mund të mbyllemi prapë dhe të dalim dhe ajo do të jetë prapë aty, kështu që nuk ka sens të mbyllemi prapë, por të kuptojmë se ky është normaliteti i ri deri kur të dalë vaksina apo virusi të transformohet në diçka tjetër që nuk është po kaq e rrezikshme. Por deri atëherë duhet të pajtohemi me faktin se nuk mund të jetojmë njëlloj sikur kemi jetuar, prandaj duhet të kemi kujdes“, tha Rama.
Ndërkohë në lidhje me faturën e COVID-19 deri më tani kryeministri tha se nuk është në gjendje të japë një shumë pasi ajo është duke u rritur çdo ditë.
“Nuk jam në gjendje të them shumën për arsye se ka ardhur duke u rritur dhe për arsye se disbursimet kanë vijuar dhe vijojnë ashtu sikundër edhe kreditë janë në proces, të garantuara nga shteti, është një proces dinamik“.
Por a do të shkojnë fëmijët në shkollë në shtator apo do të jetë sërish online? “Nuk e di këto janë vendime të autoriteteve përkatëse, jo të mirat. Por të gjithë duhet të kuptojmë se qeveria, shëndetësia kanë bërë dhe po bëjnë maksimumin por budallallëkun e disave nuk ka shtet në botë që e lufton, prandaj njerëzit duhet të ruhen nga budallallëku.
