Ish-kryeministri i vendit, Sali Berisha ka dalë ditën e sotme në një konferencë për mediat. Berisha ka reaguar ndaj kërkesës së ambasadores së SHBA-së në vendin tonë, Yuri Kim e cila ka bërë kërkesë për të mos u futur në parlament në shtator.
Berisha ka thënë se kërkesa e ambasadores Yuri Kim, për qëndrimin e tij jashtë Kuvendit është e pabazë, pasi sipas tij nuk është e bazuar në fakte konkrete por vetëm në shpifje. Më tej Berisha ka shtuar se nuk ka asnjë institucion në botë që të provojë ndonjë fakt korrupsionin nga ish-kryeministri.
“Në veçanti ky vendim është hakmarrje politike për kundërshtimin tim të ndryshimit të kufijve të Kosovës. Por pavarësisht nga këto nuk kam ngritur padi ndaj vendimit politik, është e drejtë e Blinken për të vendosur kush hyn dhe jo në vendin tij. Kam ngritur padi kundër shpifjeve. Karakterin e këtij vendimi politik e provon kërkesa publike e Yuri Kim për mosfutjen time në Parlament, duke mos pasur asnjë fakt, provë apo dokument përveç kërcënimeve me dogmën e barit që ka përdorur Enver Hoxha dhe e përdorin sot albanofobë të pandreqshëm. Shpreh besimin tim të plotë te paanësia e gjykatës, dhe garantoj shqiptarët se nuk ka asnjë institucion që të vërtetojë ndonjë fakt korrupsioni për Sali Berishën”, ka thënë ai.
