Ndonëse dita e sotme është konsideruar si dita kur vendi ynë u hap, pas izolimit nga pandemia dhe kufizimeve të qeverisë, ka ende shumë paqartësi.
Qeveria ka lajmëruar se Shqipëria ka hapur kufijtë, ende nuk është saktësuar se me cilët vende ne do të mund të kemi hyrje-dalje.
Agjencitë turistike shprehen se ende nuk i kanë marrë prenotimet e para sa i takon sezonit veror dhe aktualisht ato po merren me pjesën e rezervimeve për udhëtimet brenda për brenda vendit.
Jetmira Hoxha përfaqësuese e një Agjencie Turistike thotë se nuk është e qartë se cili kufi është hapur.
“Nuk është e qartë pjesa se kush kufi është hapur, Greqia për shembull i hap kufijtë me datë 15, dhe ne jemi në pritje të vendimit për tu sqaruar më tej. Përsa i përket pjesës së turizmit ne kemi përgatitur paketat brenda për brenda vendit, gjithashtu edhe hotelet, për ata që duan të pushojnë në fundjavë, ose gjatë javës”, tha Jetmira Hoxha
Pikëpyetja më e madhe një situatë të tillë është nëse do të ketë turistë të huaj këtë vit?
Sipas Hoxhës, ende nuk ka asnjë rezervime.
“Për momentin nuk janë ndjerë fare, sepse as ata vetë nuk e dinë. Gjermani ende kufijtë me vendet e Bashkimit Evropian, ne presim vendimin e datës 8 qershor, i cili do të dalë nga BE, që dhe njerëzit të fillojnë të lëvizin për të vendosur nëse do të vijnë në Shqipëri apo se ku do të punojnë”, pohon ajo.
Sakaq, ndryshe nga vitet e kaluara, këtë vit nuk ka më paketa ‘All Inclusive’, por pritet që çmimet të rriten.
“Është hequr koncepti i All Inclusive për këtë vit. Nuk do të ketë, ose do të shërbehet në dhomë, ose tek pjesa e restorantit, por çmimet do të kenë një ndryshim të vogël mund edhe të rriten në varësi të situatës”, tha Hoxha.
Problem i paqartë mbetet për agjencitë turistike edhe transporti.
Ndonëse tashmë kanë krijuar skenarët e tyre për mënyrën se si do të ulen udhëtarët në autobusë, të pajisur me maska, dezinfektantë si dhe do tu matet temperatura, të gjitha këto kosto shtesë do të përfshihen tek paketa turistike.
“Ne kemi menduar edhe pjesën se si do të ulen në autobus, një vend po dhe një vend jo, me maska, dezinfektant me vete, dhe do t’ju matet temperatura. Kostot shtesë janë llogaritur të gjitha tek pjesa e biletës”, shprehet Hoxha.
Një problem tjetër që lidhet me sezonin turistik është edhe deklarata e ministrit të Turizmit Blendi Klosi, i cili u shpreh se sezoni turistik do të shtyhet deri më datë 15 nëntor me qëllimin që bizneset të kenë mundësi të rikuperojnë të ardhurat që humbën nga ditët e karantinës në muajt prill dhe maj.
Kreu i Shoqatës së Turoperatorëve dhe Agjencive Turistike, Rexhep Kasmi, në një prononcim për “Iconstyle.al” e përkufizoi këtë vendim si diçka shumë “absurde”.
Ai vazhdoi duke shpjeguar se ata në fakt kanë punuar gjatë gjithë kohës për të zgjeruar sezonin turistik, por të paktën deri në shtator, jo deri në 15 nëntor siç pretendon ministri, pasi nuk është aspak në dorën e tij.
“Nuk është në dorën e ministrit që të caktojë kohën e pushimeve dhe të zgjasë sezonin turistik. Është absurde të bësh këtë deklaratë. Ai duhet të japë dorëheqjen. Duhet të ketë qenë tapë se një njeri normal nuk e thotë këtë”.
Sektori i turizmit është dëmtuar rëndë pasi 70% e turistëve i kanë anuluar prenotimet dhe pjesa tjetër është ende pezull.
Sipërmarrëst e kësaj industrie po përballen me periudhën më të errët, pasi dëmet janë shumë të mëdha, sidomos nëse përmendim zonat përreth Adriatikut që u goditën edhe nga tërmeti i 26 nëntorit.
