Aldi Neziri, 21-vjeçari i arrestuar për plagosjen e një të mituri në një piceri në zonën e Ali Demit në Tiranë, ka dhënë dëshminë e tij para grupit hetimor, duke pretenduar se ngjarja ka qenë aksidentale. Sipas deklaratës së tij, arma është shkrepur pa dashje teksa ndodhej në tavolinë me 15-vjeçarin.
“Arma u shkrep aksidentalisht. Nuk e kisha për qëllim ta plagosja,” ka thënë Neziri gjatë marrjes në pyetje nga hetuesit.
Ngjarja ndodhi pasditen e së dielës, brenda ambienteve të picerisë “Fantazia”, ku 15-vjeçari mbeti i plagosur me armë zjarri. I mituri, për shkak të gjendjes së rënduar, ka deklaruar për policinë se nuk e kujton me saktësi mënyrën se si ka ndodhur plagosja.
Pas incidentit, ai e ka hedhur armën në zonën e Laprakës me qëllim zhdukjen e provave.
Ndërkohë, hetimet kanë zbuluar se tre punonjës të picerisë janë përfshirë në tentativën për të fshehur ngjarjen. Ata akuzohen për ndërhyrje në vendin e krimit, fshirjen e gjurmëve dhe provave, si dhe për mosnjoftimin e menjëhershëm të policisë.
Sipas burimeve nga grupi hetimor, Policia e Shtetit është njoftuar vetëm pasi i mituri ishte transportuar në spital. Gjatë kontrollit të mëvonshëm në piceri, efektivët konstatuan se ambienti ishte pastruar dhe pamjet nga kamerat e sigurisë ishin fshirë.
Edhe pse Neziri këmbëngul se plagosja ka ndodhur pa dashje, hetimet paraprake ngrenë dyshime serioze se incidenti nuk ka qenë aksidental. Policia ka shpallur gjithashtu në kërkim administratorin e picerisë, pasi dyshohet se ka pasur dijeni ose përfshirje në fshehjen e provave apo rrethanave të ngjarjes.
Hetimet për këtë rast vijojnë me qëllim zbardhjen e plotë të motiveve dhe përgjegjësive të secilit të përfshirë.
