Numri i familjeve të varfëria në Shqipëri rritet nga viti në vit, kjo edhe për shkak të varfërisë dhe krizës ekonomike në të cilën është futur vendi në vitet fundit.
Por familjet e varfra të klasifikuara në 20 përqindëshin e poshtëm të të ardhurave mujore, shpenzojnë shumë më tepër për t’u argëtuar, për restorante dhe hotele, sesa për t’u arsimuar.
Sipas anketës së INSTAT-it për strukturën e shpenzimeve mujore në familjet shqiptare për vitin 2019, arsimi, i cili është mjeti kryesor për të ndryshuar perspektivën e varfërisë për këto familje, mbetet më i nënvlerësuar.
Të dhënat zyrtare tregojnë se, familjet e varfra shpenzojnë vetëm 0.2% të buxhetit të tyre mujor për arritjet mësimore.
Në të kundërt, shpenzimet për argëtim, restorante dhe hotele, marrin 3.2% të buxhetit mujor të tyre. Shpenzimet për këto shërbime shihet të jenë 16 herë më të larta se ato për arsim.
Më shumë se gjysma e shpenzimeve mujore totale tek ky grup familjesh shkon për blerjen e ushqimeve, të cilave u dedikojnë 53.8% të totalit të shpenzimeve. Konsumi i ushqimeve tek ky grup, është të paktën 13% më i lartë se mesatarja e përgjithshme.
Megjithëse, buxheti dedikuar ushqimeve po ulet nga viti në vit, ai vijon të jetë i lartë në raport me vendet e rajonit dhe të Europës së zhvilluar.
Pas ushqimeve, banesa kryesisht qiradhënia merr pjesën më të madhe të buxhetit të familjeve të varfra. 17.5% e shpenzimeve mujore shkojnë për banesën kryesisht qira dhe 4.8^ të tjera shkojnë për mobilimin dhe mirëmbajtjen e shtëpisë.
Struktura e shpenzimeve në familjet e varfra është e ulët për arsim, shëndetësi dhe veshje. Vetëm 3.3% e shpenzimeve të tyre shkojnë për shëndetin.
Të varfrit shihet se kanë fokus për të shpenzuar më shumë për mallra dhe shërbime që nuk u sigurojnë atyre një zhvillim të qëndrueshëm.
Shpenzimet për mallra të tilla jo të domosdoshme, të tilla si alkooli, duhani, argëtimi dhe restorantet zënë më shumë peshë se harxhimet që ata bëjnë për t’u arsimuar dhe për të mbrojtur shëndetin.
Rreziku për të qenë i varfër ose përjashtimi social, që sipas INSTAT, u referohet individëve që janë në rrezik për të qenë të varfër ose thellësisht të privuar materialisht ose që jetojnë në familje me intensitet shumë të ulët në punësim, përfshinte 49% të popullsisë në vitin 2018.
/Burimi: INSTAT/GazetaReforma.com/
