Ministria për Europën dhe Punët e Jashtme ka sqaruar vendimin e sotëm të Greqisë për të njohur pasaportat e skaduara shqiptare deri në datën 31 dhjetor të 2020.
Në njoftimin e MEPJ-së thuhet se pasaportat do të pranohen si dokumente të vlefshme dhe diçka e tillë u krijon emigrantëve shqiptarë lehtësi.
Gjithashtu emigrantëve shqiptarë nuk do u kërkohet leje kalimi në rast udhëtimi nga Greqia për në Shqipëri.
Kujtojmë se javën e kaluar pjesa më e madhe e emigrantëve që kishin ardhur në Shqipëri, ishte për shkak të afatit të skadimit të pasaportave.
Me vendimin e ri të qeverisë greke deri më 31 dhjetor emigrantët, edhe ata me pasaporta të reja mund t’i kryejnë procedurat e rinovimit të lejes së qëndrimit apo të tjera me pasaportat e skaduara deri më 31 dhjetor.
Njoftimi nga MEPJ:
Ministria për Evropën dhe Punët e Jashtme bën me dije se nga Zyrat e të Huajve të shtetit grek, deri në datën 31 dhjetor 2020, do të pranohen si dokumente të vlefshme të gjitha pasaportat shqiptare, të cilat kalojnë afatin e vlefshmërisë brenda vitit 2020.
🟢 Ky vendim i qeverisë greke krijon lehtësi për emigrantët shqiptarë, të cilët do të mund të marrin shërbimet e nevojshme në shtetin grek, duke përfshirë rinovimin e lejeve të qëndrimit, shërbimet e mbrojtjes sociale, shëndetësore e arsimore. Gjithashtu, emigrantëve shqiptarë nuk do t’ju kërkohet leje kalimi në rast të udhëtimit të tyre nga Greqia për në Shqipëri.
