Katerina Beqo, rreth 37 vjeç, bashkëshortja e Roan Brahimit i cili u ekzekutua më 9 maj 2024 në rrugën “Bajron” në Athinë është vendosur sërish në qendër të një tjetër ngjarjeje tragjike.
Mbrëmjen e djeshme, vjehrri i saj u qëllua për vdekje, duke e përfshirë sërish familjen në një spirale hakmarrjeje dhe dhune që duket se lidhet me konfliktet mes grupeve kriminale.
Pak pas këtij atentati, një tjetër incident i rëndë ndodhi pranë zonës së Shkozës, ku një automjet tip Mercedes-Benz G-Class, në të cilin ndodheshin katër të rinj dy prej tyre të mitur u qëllua me breshëri plumbash. Dyshohet se ngatërresa erdhi për shkak të ngjashmërisë së mjetit me atë që përdor bashkëshortja e Brahimit.
Ngjarja e parë që i vuri në shënjestër këtë familje ndodhi në Athinë, kur Roan Brahimi u qëllua për vdekje ndërsa ndodhej në automjet me Katerina Beqon dhe djalin e tyre të mitur. Autorët, të veshur me rroba të errëta, u afruan me motoçikletë dhe hapën zjarr sapo ai ndaloi makinën, duke e lënë të vdekur në vend. Beqo dhe fëmija shpëtuan pa lëndime fizike, por me trauma të thella psikologjike.
Policia greke deklaroi se hetimet po zhvillohen nën dyshimet për një larje hesapesh midis grupeve kriminale shqiptare që veprojnë në Greqi. Në dëshminë e saj, Beqo tregoi se nuk e kishte ditur që i shoqi do të vinte në Greqi për festat e Pashkëve Ortodokse.
“Erdhi të shtunën e Pashkës. Nuk më kishte njoftuar më parë, ishte surprizë. Isha në makinë me të, por nuk mbaj mend shumë nga çfarë ndodhi. Më pas dola nga makina…”, rrëfeu ajo për hetuesit.
Ajo po ashtu konfirmoi se ngjarja kishte ndodhur para syve të djalit të tyre të vogël. “Fëmija pa gjithçka. Tani është me mamin tim, ndërsa unë jam në shtëpi. Nuk jam aspak mirë.”
Sipas hetimeve, Brahimi kishte shkuar për t’i marrë me makinë nga parku ku ndodheshin Beqo dhe djali, kur ndodhi atentati fatal.
