Vijon frika nga tërmetet në vendin tonë. Pas atij që lëkundi Vlorën mbrëmjen e së hënës, sipas EMSC-së, në orën 04:23 të mëngjesit të sotëm, një tërmet me magnitudë 3.6 i shkallës Rihter është ndjerë në 2 qytete, Korçë dhe Çorovodë.
Mësohet se epiqendra ka qenë 17 km larg Çorovodës dhe 33 km larg Korçës. Lëkundjet kishin 0 thellësi dhe banorët i kanë ndjerë shumë. Fatmirësisht nuk ka pasur dëme në njerëz apo materiale.
Kohët e fundit lëkundjet sizmike kanë rikthyer frikën e panikun në vendin tonë. Më 25 qershor një tërmet me magnitudë 3.3 goditi Shqipërinë e Mesme dhe lëkundjet u ndjenë në Tiranë, Shijak dhe Durrës. Tërmeti që rezultoi tragjik ishte ai i 26 nëntor të vitit të kaluar, ku humbën jetën 51 viktima dhe mijëra të tjerë u lënduan.
