Pas rifillimit të punimeve arkeologjike në kalanë e Gjirokastrës, po shfaqen dëshmi të reja që pasurojnë njohuritë për historinë e lashtë të këtij monumenti.
Në zonën e murit antik, i zbuluar së fundmi, arkeologët kanë gjetur një skelet njerëzor që, sipas vlerësimeve fillestare, i përket një mashkulli të ri. Pozicioni i skeletit tërheq vëmendje, pasi trupi ndodhet brenda murit, ndërsa këmbët shtrihen jashtë tij, një detaj i pazakontë që mund të ndihmojë në kuptimin e praktikave ndërtimore ose ngjarjeve historike ende të panjohura nga periudha antike.
Gjithashtu, në të njëjtën zonë është zbuluar edhe skeleti i një kafshe, që besohet të jetë kalë, duke i dhënë më shumë kompleksitet këtij zbulimi.
Arkeologia Pamela Llapaj theksoi se përveç murit antik, janë gjetur dy skelete: një kafshe dhe një njeriu, të vendosura përgjatë gjatësisë së murit. Sipas saj, muri i përket periudhës së antikitetit të vonë, ndërsa periudha e saktë e varrimit të skeletit njerëzor ende nuk është përcaktuar, por dyshohet të jetë nga e njëjta periudhë.
Eshtrat do t’i nënshtrohen analizave laboratorike të detajuara për të përcaktuar më me saktësi kohën dhe rrethanat e varrimit.
Llapaj shtoi se kjo praktikë e varrimit në zona që më parë kanë qenë të rrënuara ose janë hapur artificialisht për varrim, është një dukuri e njohur gjatë antikitetit të vonë.
Gjatë gjithë verës, kërkimet arkeologjike do të vazhdojnë në pika të ndryshme të kalasë së Gjirokastrës, me qëllim të dokumentimit të mëtejshëm të historisë së këtij objekti të rëndësishëm kulturor.
