Gazetarja Klodiana Lala deklaroi se kryeministrit Edi Rama “i kanë rënë maskat”, pasi sipas saj ai ka zgjedhur të mbrojë zv/kryeministren Belinda Balluku në momentin kur SPAK, sipas pretendimeve të ngritura publikisht, ka tentuar të veprojë ndaj saj për çështje që lidhen me tenderë me vlera të mëdha.
Në një intervistë në emisionin “Studio24” në News24, Lala foli për reformën në drejtësi dhe komentoi qëndrimet publike të Ramës, duke u ndalur veçanërisht te çështja e Ballukut. Sipas saj, kryeministri është shprehur prej vitesh se reforma në drejtësi është vepër e tij, por mbrojtja që i ka bërë Ballukut, sipas Lalës, bie ndesh me këtë pretendim.
Gazetarja tha se ky qëndrim i Ramës nuk lidhet me drejtësinë, por me interesa personale. Sipas saj, kryeministri nuk ka më as të drejtën morale të dalë para qytetarëve dhe të flasë për drejtësinë, pasi zgjodhi të mbrojë një zyrtare të lartë të qeverisë kur u përmend mundësia e arrestimit të saj.
“Zotit Rama i kanë rënë maskat, pasi na ka thënë 13-14 vjet që reformën në drejtësi e bëra unë, por fakti që mbrojti zonjën Balluku me forcën e kartonit, nuk ka të paktën moralisht asnjë të drejtë të dalë para qytetarëve dhe të flasë për çështje të drejtësisë.
Është e drejtë që kur dikush shkel ligjin të shkojë prapa hekurave. Por te rasti konkret, Qamil Zela, ka qenë 52-vjeçar, është vetëvarur në 2024 në burgun e Rrogozhinës, ndaj tij kishte një masë sigurie për lidhje të paligjshme të energjisë. Pak ditë pasi shkoi në paraburgim u vetëvar. Nga ana tjetër kemi zonjën Balluku që akuzohet për abuzime me tenderë miliona euro, ka abuzim me tenderë, në thelb do të thotë që ke shkelur konkurrencën e ndershme, dëmi që u ka ardhur qytetarëve shqiptarë është shumë herë më i madh.
Në arsyetimin e vitit 2014 zoti Rama nuk pati asnjë pretendim sa i përket caktimit të masës së sigurisë ‘arrest me burg’ sa i përket një qytetari. Dhe nga ana tjetër, kur SPAK guxoi për herë të parë… Tenderat e rrugëve janë tenderët më të kushtueshëm dhe në momentin që u artikulua fjala burg, apo pati përpjekje të SPAK për ta arrestuar, zoti Rama e mbrojti me forcën e kartonit. Zoti Rama në 14 vite qeverisje nuk ka pyetur në këtë vend që kanë shkuar prapa hekurave nëna me fëmijë…”, tha ajo.
Lala vuri në dukje edhe kontrastin mes trajtimit të qytetarëve të zakonshëm dhe zyrtarëve të lartë, duke përmendur rastin e Qamil Zelës, i cili sipas saj përfundoi në paraburgim për lidhje të paligjshme të energjisë dhe më pas u vetëvar në burgun e Rrogozhinës. Në anën tjetër, sipas saj, përballë dyshimeve për abuzime shumë milionëshe me tenderë, Balluku mori mbështetje politike të hapur nga Rama.
