Gazetari Artan Hoxha ka deklaruar se ndikimi i krimit në zgjedhje ka vazhduar edhe gjatë këtij procesi zgjedhor, por në mënyrë të fshehtë, duke krijuar efekte që bëhen të dukshme pas përfundimit të zgjedhjeve.
Në një intervistë për Euronews Albania, Hoxha kritikoi SPAK për dështimin e tij në parandalimin e krimeve zgjedhore, duke e cilësuar këtë institucion si të paaftë për të realizuar misionin e tij.
Ai gjithashtu komentoi takimet e kreut të SPAK, Altin Dumanit, në Shkodër dhe Lezhë, duke i konsideruar ato si thjesht shfaqje mediatike.
Një tjetër rast që Hoxha solli në vëmendje ishte marrja peng e një përfaqësuesi të opozitës nga anëtarë të një force politike të kundërt. Sipas tij, ky incident ka ndodhur në mes të ditës dhe nuk është bërë publik.
“Një mbështetës i opozitës është marrë peng nga njerëzit e një kandidati të mazhorancës, është marrë peng në qytetin X, është e filmuar, dhe e kanë lëshuar në Rrugën e Kombit. E kanë futur në bagazh dhe e kanë çuar atje se sipas llogarive te tyre ky njeri me fushatën që po bënte po iu prishte punë. Dhe lirimi i pengut mesa di unë është bërë edhe me ndërhyrjen e policisë, madje oficerë të lartë të policisë dhe personat përgjegjës nuk janë arrestuar. Kjo ngjarje është ngjarje e freskët”, tha Hoxha.
