Gazetarja Klodiana Lala ka hedhur dyshime të forta lidhur me identitetin e një personi të katërt që mund të ketë qenë i pranishëm në automjetin që u përdor për atentatin në Dobraç të Shkodrës më 30 tetor.
Lala ka bërë të ditur se pas rikëqyrjes së makinës, janë zbuluar dy detaje që ngritën dyshime për një person të tretë apo të katërt. Sipas saj, gjurmët e gjakut të gjetura në sediljen e pasme të automjetit sugjerojnë se një person mund të ketë qenë i plagosur,janë gjetur tre pistoleta dhe njëra është përdorur nga personi i ulur në pjesën e pasme të automjetit.
Ajo gjithashtu ka përmendur se automjeti i drejtuar nga Hamza Lici u qëllua për 150 metra dhe më pas përfundoi në një mur pas humbjes së kontrollit.
Lala ka theksuar se autorët qëlluan mbi 70 plumba për të siguruar vdekjen e Arlind Bushati. Ajo ka shtuar se një person me duar të mbushura me gjak është shfaqur në videot pas atentatit, dhe dyshon se Ibrahim Lici mund të ketë qenë i pranishëm në makinë, por është larguar me urgjencë.
Sipas gazetares, Lici mund të ketë qenë i rrezikuar nga atentatorët dhe gjithashtu në kërkim ndërkombëtar për vrasjen e Endri Mustafës dhe disa akuza të tjera, që e bënin të nevojshme largimin e tij.
