Ekzekutimi i ish-policit, Santiago Malko në zonën e Porcelanit në kryeqytet dyshohet se është kryer nga një vrasës me pagesë nga Vlora.
Sipas “Shqiptarja.com”, bëhet fjalë për Fatmir Hysenin, i cili mendohet se është kontaktuar nga vëllezërit, Erlis dhe Leonard Duka.
Më pas atentati është kryer edhe me mbështetjen e anëtarëve të tjerë të skuadrës, të cilët janë Oltion Loga, Dritan Agaj, Ervis Metani, Ilir Selmani dhe Bledar Teta, i cili për momentin është i vetmi i arrestuar.
Referuar të dhënave që ka mbledhur policia, rezulton se drejt Malkos kanë qëlluar Hyseni dhe Elvis Gaçaj, ose “gabeli”, i cili është pjesë e klanit “Duka”, që në Tiranë njihet ndryshe si “banda e romëve”.
Hyseni në Vlorë njihet me nofkën “Doqe” dhe është i dyshuar si një nga bashkëpunëtorët e vrasjes së vëllait të Viktor Ymerit në Vlorë, i cili njihet si “Tori i Xhihanes”.
Sipas informacioneve të marra nga policia e Vlorës, vrasja e vëllait të Viktorit ka ndodhur në Vlorë në 1999-ën dhe ky i fundit ka qenë daja i Edison Harizajt.
Ky i fundit konsiderohej si i paprekshëm, por u ekzekutua në 7 nëntor 2018 në dalje të Durrësit, atentat ku mbeti i vdekur edhe Genci Caci.
Fatmir Hyseni ndërkohë është kunati i Dritan Veselit, që njihet në Vlorë me nofkën “Didi i Vlorës” ose “Didi çami”, i cili u ekzekutua më 14 shtator të 2004-ës në qytetin bregdetar.
Hyseni dhe Didi konsiderohen nga policia si kundërshtarët më të mëdhenj të Viktor Ymerit dhe Edison Harizajt.
Ky i fundit është vrarë, ndërsa Ymeri vuan dënimin me 24 vite burg në Peqin, për vrasjen e Gëzim Muçës dhe Taulant Maskës në Romë.
Viktori ka mbi supe edhe një dënim prej 25 vitesh, për vrasjen e Arben Pajës dhe Ilir Xhungës, të dy anëtarë të ish-bandës së Durrësit.
Ndërkohë tre vëllezërit Veseli janë vrarë si pasojë e Hasmërisë mes familjeve Harizaj dhe Ymeri.
Pas eleminimit të tyre, komandën e ka marrë në dorë Hyseni, i cili ka lidhur aleancë me dy ish-anëtarë të bandës së Gaxhait në Vlorë, Armando Sulejmanin i njohur si “Çipuri” dhe Sokol Sinematin me nofkën “Buzderri”.
Suljemani i ka shpëtuar disa atentateve dhe ndodhet në burg për armëmbajtje pa leje.
Ndërkohë Sinemati dhe Hyseni vijojnë të qarkullojnë të lirë.
Anëtarët e klanit Duka arritën që të shpëtonin nga drejtësia edhe pse u kapën te kompleksi “Halili” me një pistoletë tip “Glock” dhe një sasi të vogël hashashi.
