Ditën e sotme ka nisur procesi i vaksinimit edhe në qytetin e Korçës. Janë të parët mjekët dhe infermierët ata që do të vaksinohen e më pas vaksinimi do të vazhdojë në grupe të tjera të popullsisë.. Ditën e parë të vaksinimit do të marrin dozën e parë 150 mjekë e infermierë të spitalit të Korçës dhe të qendrave shëndetësore. Në këtë qark janë parashikuar të vaksinohen rreth 1000 persona pjesë e stafit shëndetësor.Procesi i vaksinimit po kryhet në ndërtesën e Ish-Shtëpisë së Oficerëve.
Ndërkohë, procesi i vaksinimit në vendin tonë është duke ecur me ritme mjaft të ngadalta me vetëm 17 355 vaksina të ardhura deri tani. Në Shqipëri kanë marrë vetëm dozën e parë të vaksinës Pfizer në total 11 136 persona. Procesi i vaksinimit duket se është në vend numëro, ndërsa qeveria nuk bën transparente asnjë të dhënë, ndërsa vetëm lajmërohet se do të vijnë doza të tjera, por nuk dihet kur. Kryeministri Rama nuk ka bërë publike asnjë nga kontratat me Pfizer dhe as nuk i tregon emrat e shteteve që dalin të gatshme për të na ofruar vaksina. Ndër të tjera, janë vaksinuar edhe personalitete të njohura të moshës mbi 80 vjeç, sipas përzgjedhjes së kryeministrit. Ndërkohë, të tjerët presin për një proces që nëse ecën me këto ritme mund të zgjarë mijëra ditë.
