Nis ditën e sotme seanca e parë e legjislaturës së 10-të në Kuvendin e Shqipërisë. Seanca plenare do të jetë e ndarë në dy orare, pjesa e parë do të mbahet në orën 10:00 ku fillon punën Parlamenti dhe do të ngrihet një komision i posaçëm për verifikimin e mandateve. Ndërsa në orën 17:00 do të bëhet betimi i deputetëve që kanë dalë fitues në zgjedhjet e 25 prillit.
Në institucionin e dytë më të rëndësishëm shtetëror në vend nuk do të ulen 140 deputetë, pasi në seancën plenare sot do të ketë 4 karrige bosh, 1 nga opozita dhe 3 nga mazhoranca.
Kjo për shkak edhe të dorëheqjeve që ndodhën gjatë verës nga ana e mazhorancës. Në Partinë Socialiste do të jetë bosh karrigia e Gramoz Ruçit, Najada Çomos dhe Lefter Kokës, ndërsa në kampin blu do të jetë boshë vetëm karrigia e Mark Markut, ish-drejtuesi politik i PD-së në qarkun e Lezhës. Ndërkohë, KQZ mësohet se nëse kërkesa nga Kuvendi dërgohet sot, do të procedojë po sot për të bërë zëvendësimin e deputetëve që janë tërhequr pas zgjedhjeve të 25 prillit.
Gjithashtu rregullorja e Kuvendit përcakton se drejtues i seancës së parë plenare është deputeti më i vjetër në moshë, pra Luljeta Bozo. Lindita Nikolla është e përzgjedhura e kryeministrit Rama për të drejtuar Parlamentin në këtë legjislaturë. Procedura saktëson se emri i saj do të duhet të propozohet nga të paktën 15 deputetë, ndërkohë që zgjidhja zhvillohet pa debat dhe me votim të fshehtë.
Kujtojmë se mbrëmë kreu i Partisë Demokratike, Lulzim Basha deklaroi se Sali Berisha nuk do të jetë pjesë e grupit parlamentar të PD-së, deri në zbardhjen e plotë të vendimit të DASH, e ku të sqarohet e gjithë e vërteta. Basha tha se PD është partia më proamerikane dhe më proevropiane duke folur dhe për vendimin e DASH për ish-kryeministrin dhe ish-kreun e PD Sali Berisha si dhe kërkesën e ambasadores amerikane Yuri Kim. Nga ana tjetër, dje në një dalje për mediat Berisha konfirmoi pjesëmarrjen e tij në Kuvend.
