Përmet– Ka nisur seanca gjyqësore për 30 të arrestuar në kuadër të operacionit Mezhgoran, mes të cilëve edhe gazetari Henri Çili.
Të arrestuarit kanë mbërritur në Gjykatën e Përmetit, teksa kamerat kanë filmuar momentin kur ata dalin nga makina e policisë, ku vëmendjen e ka marrë drejtuesi i UET.
Sakaq, bëhet me dije, se me kërkesë të prokurorit Asllan Bajrami është ndryshuar gjyqtari i çështjes dhe është vendosur Dritan Hasani, ndërsa njëri nga të arrestuarit nuk do të jetë prezentë në sallë, pasi ndodhet në gjendje jo të mirë shëndetësore në spital.
Kujtojmë se Henri Cili akuzohet nga prokuroria e Gjirokastrës për ndërhyrjen te funksionarët e lartë publikë për lirimin nga burgu të dy vëllezërve Aliko, akuzuar për vrasjen e efektivit të policisë Ibrahim Basha, gjatë ndërhyrjes së policisë së shtetit në Lazarat.
Jashtë dyerve të gjykatës, janë mbledhur miq e kolegë të Çilit për të ndjekur nga afër situatën, mes të cilëve dy gazetarë të njohur, analisti Preç Zogaj e ish-kryeredaktori i Mapo, Arjon Sulo, së bashku me ish-kreun e Bashkisë së Shëngjinit Salvador Kaçaj.
Të arrestuarit akuzohen për “Prodhimi dhe shitja e narkotikëve”, “Ushtrimi i ndikimit të paligjshëm ndaj personave që ushtrojnë funksione publike”, ‘’Falsifikimi i dokumenteve dhe kartëmonedhave”, “Mbajtja pa leje e armëve të zjarrit dhe lëndëve plasëse”, “Organizimi i lotarive të palejuara”, “Pastrimi i produkteve të veprës penale apo veprimtarisë kriminale”, “Fshehja e të ardhurave”, “Mashtrimi”, Moskallëzimi i krimit”, “Përkrahja e autorit të krimit” dhe “Shpërdorim detyre”.
