Procesi i rinumërimit të një pjese të votave për qarqet Tiranë, Elbasan, Fier dhe Durrës nisi këtë të martë, në zbatim të vendimit të Komisionit të Ankimimeve dhe Sanksioneve.
Ky proces po zhvillohet në Pallatin e Sportit “Farie Hoti” në Tiranë dhe do të ndahet në dy faza: fillimisht do të numërohen votat për subjektet politike, ndërsa më pas do të vijojë rinumërimi i votave për kandidatët për deputetë.
Numërimi po kryhet në 24 tavolina të posaçme, ku pranë tyre ndodhen vëzhgues të autorizuar nga tre subjektet ankimuese: Koalicioni PD-ASHM, Partia Socialiste dhe Partia Mundësia.
Detajet e procesit janë si më poshtë:
• Janë hapur gjithsej 2,323 qendra votimi, përfshirë edhe 85 kuti nga jashtë vendit.
• Për rinumërimin janë angazhuar 24 grupe, me 63 punonjës të administratës; prej tyre 48 numërues dhe 15 zëvendësues.
• Procesi po monitorohet nga vëzhgues të autorizuar nga subjektet që kanë bërë ankim.
Sipas qarqeve:
Tiranë
• Rinumërohen të gjitha kutitë e votimit brenda vendit.
• Përfshihen 18 KZAZ dhe 1,282 qendra votimi.
Fier
• Rinumërohen të gjitha kutitë për subjektet politike dhe kandidatët.
• Përfshihen 9 KZAZ dhe 587 qendra votimi.
Durrës
• Rinumërim i plotë për 111 qendra votimi të KZAZ nr. 21 dhe 22, 126 qendra të listuara nga PD-ASHM dhe 60 qendra të kërkuara nga PLL.
• Në total do të rinumërohen 360 kuti, prej të cilave 275 brenda vendit dhe 85 nga jashtë.
Elbasan
• Rinumërohen 94 qendra votimi të KZAZ nr. 45 dhe 52, duke përfshirë edhe fletët e votimit dhe materialet e tjera zgjedhore.
Sa i përket kostove, për procesin janë shpenzuar:
• 7,858,600 lekë për sistemin e regjistrimit dhe transmetimit online të rezultateve,
• 8,480,000 lekë për infrastrukturën logjistike,
• 4,775,450 lekë për zarfe dhe materiale ndihmëse.
