Kryeministri i vendit Edi Rama, ka dalë ditën e sotme në një konferencë për mediat ku ka folur lidhur me ngjarjet e rënda që kanë ndodhur ditët e fundit në vendin tonë. Rama nga konferenca ka paralajmëruar se do të nis zbatimi i një kornize ligjore për hapësirat në plazhe. Duke marrë shkas edhe nga ngjarjet e fundit në vend ku mbetën të vrarë katër persona, pas përplasjes për hapësirat në plazhe, kryeministri Edi Rama ka thënë se policia do të jetë e pranishme në të gjithë vijën bregdetar, teksa iu bëri thirrje subjekteve që nuk kanë dokumente që të largohen nga sipërfaqet që nuk iu takojnë.
“Duke krijuar konfuzion dhe duke krijuar premisa për konflikte. Një gjë është e padiskutueshme se ajo çka është përcaktuar si kornizë e këtij procesi do të zbatohet me hir ose me pahir. Dua që t’i bëj thirrje të gjitha atyre subjekteve që nuk janë në rregull me dokumentacionin dhe që kanë operuar me teorinë e faktit të kryer që ta largohen nga sipërfaqet që nuk iu takojnë me lidh dhe me rregull. policia do jetë e pranishme në të gjithë vijën bregdetare dhe do të konfiskojë çdo çadër, strukturë që nuk është e përputhur me bazën dokumentare të subjektit.
Plazhet janë të popullit, të qytetarëve. Kjo skemë e re e administrimit të hapësirës së plazheve ka krijuar më shumë të ardhura për sektorin publik dhe më shumë hapësira për qytetarët që nuk dëshirojnë të jenë pjesë e hapësirave ku plazhi administrohet nga privati. Besoj që përtej disa rasteve që janë bërë publike dhe disave që nuk janë bërë publike, në tërësi baza është pozitive, por në ditët në vijim kjo bazë duhet konsultuar, që piku i sezonit, korriku dhe gushti të jenë të garantuara në këtë aspekt. Subjektet që nuk janë aty ku janë vendosur me teorinë e faktit të kryer do të largohen vetë dhe të mos humbasin dhe atë bazë materiale që kanë siguruar për aktivitetin e tyre sepse ajo do t’u merret si mjet uzurpimi i paligjshëm”, deklaroi kryeministri i vendit Edi Rama.
