Ngjarje e rëndë në Gjirokastër. Një shtetas 72-vjeçar i ka vendosur flakën gruas së tij me benzinë, pas një sherri në familje. Policia e Shtetit njofton se 72-vjeçari Panajot Janaqi, banues në fshatin Këllëz, ka djegur me lëndë djegëse benzinë bashkëshorten e tij.
Si pasojë e plagëve të rënda që ka pësuar nga djegia, e moshuara është transportuar në spitalin rajonal Gjirokastër. Fatmirësisht, ajo ndodhet jashtë rrezikut për jetën sipas policisë.
Panajot Janaqi nuk është një emër i panjohur për policinë. 72-vjeçari ka pasur një konflikt me vëllain e tij në muajin qershor të vitit të shkuar, ku u shoqërua në komisariat dhe iu sekuestruan dy armë gjahu, një me leje e një pa leje.
Njoftimi i Policisë për ngjarjen e 19 qershorit 2020:
Një konflikt për motive të dobëta ka ndodhur mes dy vëllezërve në Gjirokastër, njëri prej të cilëve është kryeplak në fshatin Këllëz, Njësia Administrative Lunëxhëri. Përshkallëzimi i sherrit mes Panajot dhe Jano Janaqi u ndalua me ndërhyrjen e policisë.
Forcat e policisë arritën menjëherë në vendngjarje dhe nisën kontrollin në banesën e kryeplakut Jano ku gjetën armatime. Në cilësinë e provës materiale, u sekuestruan dy armë gjahu pa leje dhe një me leje. Ndërkohë që po kryhen veprimet proceduriale, kryeplaku është shoqëruar për në komisariat.
